Gold Price : పసిడి ప్రియులకు గుడ్ న్యూస్.. త్వరలోనే రూ.12వేలు తగ్గనున్న బంగారం ధర

Gold Price : గత కొద్ది నెలలుగా బంగారం ధరలు చాలా అటూ ఇటూ ఊగిసలాడాయి. ఒకానొకప్పుడు 10 గ్రాముల బంగారం లక్ష రూపాయలకు కూడా చేరింది. ఇప్పుడు కొంచెం తగ్గింది. రీసెంట్‌గా జరిగిన కొన్ని పరిణామాల వల్ల బంగారం ధరలు రూ.2,000 వరకు తగ్గాయి. ఇప్పుడు 10 గ్రాముల బంగారం ధర సుమారు రూ.97,000 దగ్గర ఉంది. కానీ, ఎక్స్‌పర్ట్స్‌ (నిపుణులు) చెబుతున్న దాని ప్రకారం.. రాబోయే రోజుల్లో బంగారం ధర రూ. 12,000 వరకు తగ్గవచ్చట. అంటే, 10 గ్రాముల బంగారం ధర రూ. 80,000 నుంచి రూ. 85,000 మధ్య ఉండొచ్చని అంచనా వేస్తున్నారు.

కేడియా అడ్వైజరీ అనే సంస్థ డైరెక్టర్ అజయ్ సురేష్ కేడియా మాట్లాడుతూ.. "ఇప్పుడు బంగారం ధర కొంచెం పెరిగినట్లు కనిపించినా, భవిష్యత్తులో బంగారానికి మద్దతు ఇచ్చే కారణాలు తగ్గుతాయి. అప్పుడు ధరలు తగ్గే అవకాశం ఉంది. ఏప్రిల్-మే నెలల్లో బంగారం ధర 10 శాతం తగ్గింది. అదేవిధంగా, ఇప్పుడున్న ధర నుంచి మరో రూ. 12,000 తగ్గవచ్చు" అని చెప్పారు.

బంగారం ధర ఎందుకు తగ్గుతుంది?

బంగారం ధర తగ్గడానికి కొన్ని ముఖ్యమైన కారణాలు ఉన్నాయి

పెట్టుబడిదారులు లాభాలు తీసుకుంటున్నారు: బంగారం ధరలు బాగా పెరిగినప్పుడు చాలా మంది పెట్టుబడిదారులు తమ బంగారాన్ని అమ్మి లాభాలు (Profit Booking) తీసుకున్నారు. ఇప్పుడు వాళ్ళు బంగారం నుంచి పెట్టుబడులు తీసేసి, వేరే చోట పెడుతున్నారు. దీనివల్ల బంగారానికి డిమాండ్ తగ్గి, ధర తగ్గుతుంది.

ప్రపంచంలో టెన్షన్లు తగ్గుతున్నాయి: ప్రపంచవ్యాప్తంగా యుద్ధాలు, ఉద్రిక్తతలు ఉన్నప్పుడు బంగారం ధరలు పెరుగుతాయి. ఎందుకంటే అలాంటి సమయంలో బంగారం సురక్షితమైన పెట్టుబడిగా భావిస్తారు. కానీ ఇప్పుడు ప్రపంచంలో టెన్షన్లు తగ్గుముఖం పడుతున్నాయి. ఉదాహరణకు, అమెరికా కొన్ని దేశాలతో పన్నుల విషయంలో కొంచెం మెత్తబడింది. దీనివల్ల బంగారానికి డిమాండ్ తగ్గి, ధర తగ్గుతుంది.

ఆర్బీఐ వడ్డీ రేట్లు తగ్గించొచ్చు: రిజర్వ్ బ్యాంక్ ఆఫ్ ఇండియా (RBI) జూన్ 6న ఒక మీటింగ్ పెడుతోంది. ఇందులో దేశ ఆర్థిక వ్యవస్థను మెరుగుపరచడానికి వడ్డీ రేట్లను (రెపో రేటు) తగ్గించే అవకాశం ఉంది. వడ్డీ రేట్లు తగ్గితే బంగారంపై పెట్టుబడులు తగ్గడం వల్ల ధర తగ్గుతుంది.

అమెరికా వడ్డీ రేట్లు తగ్గించకపోతే: అమెరికా అధ్యక్షుడు డొనాల్డ్ ట్రంప్, అమెరికా సెంట్రల్ బ్యాంక్ అయిన ఫెడ్‌ను వడ్డీ రేట్లు తగ్గించమని ఒత్తిడి చేస్తున్నారు. ఫెడ్ గనుక వడ్డీ రేట్లు తగ్గిస్తే, బంగారానికి మద్దతు లభిస్తుంది. కానీ ఇప్పుడు ఫెడ్ వడ్డీ రేట్లు తగ్గించే అవకాశం తక్కువగా ఉందని నిపుణులు అంటున్నారు.

సామాన్యులకు లాభం ఎలా?

బంగారం ధరలు తగ్గితే, పెళ్లిళ్ల కోసం లేదా పెట్టుబడి కోసం బంగారం కొనాలనుకునే సామాన్యులకు ఇది చాలా మంచి అవకాశం. తక్కువ ధరకే ఎక్కువ బంగారం కొనుక్కోవచ్చు.