Nayanthara’s Emotional Post: 22 ఏళ్ల సినీ ప్రయాణం.. నయనతార ఎమోషనల్ పోస్ట్

Nayanthara’s Emotional Post: లేడీ సూపర్ స్టార్ నయనతార సినీ రంగ ప్రవేశం చేసి నేటికి 22 సంవత్సరాలు పూర్తయింది. ఈ సుదీర్ఘ ప్రయాణాన్ని గుర్తుచేసుకుంటూ ఆమె సోషల్ మీడియాలో పంచుకున్న ఒక భావోద్వేగ పోస్ట్ ఇప్పుడు వైరల్‌గా మారింది. సినీ అభిమానులు, ప్రముఖుల నుంచి ఆమెకు అభినందనలు వెల్లువెత్తుతున్నాయి. తొలిసారి కెమెరా ముందుకు వచ్చి 22 ఏళ్లు గడిచిందని నయనతార తన పోస్టులో తెలిపారు. "నేను అనుకోకుండానే ఇండస్ట్రీలోకి అడుగుపెట్టాను. సినిమాలే నా ప్రపంచం అవుతాయని అస్సలు ఊహించలేదు. కానీ ఇక్కడి ప్రతి షాట్, ప్రతి ఫ్రేమ్ నన్ను నిలబెట్టాయి.. నాకు ధైర్యాన్ని ఇచ్చాయి. నన్ను నేనేంటో తెలుసుకునేలా చేశాయి" అని ఆమె రాసుకొచ్చారు. ఈ ప్రయాణంలో తనకు అండగా నిలిచిన ప్రతి ఒక్కరికీ ఆమె కృతజ్ఞతలు తెలిపారు.

బాలీవుడ్ వరకూ విస్తరించిన మార్కెట్

తెలుగులో చంద్రముఖి సినిమాతో పరిచయమైన నయనతార, అతి తక్కువ కాలంలోనే టాప్ హీరోయిన్‌గా ఎదిగారు. ఆమె తెలుగులో బాలకృష్ణ, నాగార్జున, వెంకటేశ్, ప్రభాస్, ఎన్టీఆర్ వంటి స్టార్ హీరోలతో కలిసి నటించి ప్రేక్షకులకు బాగా దగ్గరయ్యారు. గతేడాది షారుక్ ఖాన్ సరసన జవాన్ సినిమాతో బాలీవుడ్‌లోనూ భారీ విజయాన్ని అందుకుని తన మార్కెట్‌ను పాన్ ఇండియా స్థాయికి విస్తరించుకున్నారు.

ప్రస్తుతం చిరంజీవితో కొత్త సినిమా

ప్రస్తుతం నయనతార మెగాస్టార్ చిరంజీవి సరసన అనిల్ రావిపూడి దర్శకత్వంలో రూపొందుతున్న సినిమాలో నటిస్తున్నారు. ఈ చిత్రానికి మన శంకర వరప్రసాద్ గారు అనే టైటిల్‌ను ఖరారు చేశారు. ఈ ఫ్యామిలీ కామెడీ ఎంటర్‌టైనర్‌ను 2026 సంక్రాంతికి విడుదల చేసేందుకు చిత్ర బృందం సన్నాహాలు చేస్తోంది. ఈ సినిమాలోని మీసాల పిల్లా పాట ఇప్పటికే సోషల్ మీడియాలో ట్రెండింగ్‌లో ఉంది.