Actress Poorna: నటి పూర్ణ తన అభిమానులకు ఒక తీపి కబురు చెప్పారు. ఆమె పండంటి ఆడబిడ్డకు జన్మనిచ్చారు. పూర్ణ మరియు ఆమె భర్త షానిద్ ఆసిఫ్ అలీ దంపతులు తమ ఇంట్లోకి కొత్త అతిథిని ఆహ్వానించినట్లు సోషల్ మీడియా ద్వారా ప్రకటించారు.
శనివారం తెల్లవారుజామున 4:25 గంటలకు, అంటే సరిగ్గా ఫజర్ ప్రార్థనల సమయంలో పాప పుట్టినట్లు పూర్ణ వెల్లడించారు. ఆ మధుర క్షణాన్ని పంచుకుంటూ, పాప పుట్టిన వెంటనే సాంప్రదాయం ప్రకారం చిన్నారి చెవుల్లో 'అజాన్' మరియు 'ఇఖామహ్' పఠించినట్లు ఆమె పేర్కొన్నారు. ఈ దంపతులు తమ గారాల పట్టికి 'దువా జమీలా' అని పేరు కూడా పెట్టుకున్నారు.
తమ కుమార్తెకు నిండు ఆయురారోగ్యాలు, మంచి మనసు కలగాలని కోరుకుంటూ పూర్ణ దేవుడికి కృతజ్ఞతలు తెలిపారు. ఈ పాప తమ కుటుంబం మొత్తానికి దేవుడు ఇచ్చిన గొప్ప వరమని ఆమె ఎంతో ఆనందంగా చెప్పారు. పూర్ణ-షానిద్ దంపతులకు ఇది రెండో సంతానం. వీరికి ఇప్పటికే హమ్దాన్ ఆసిఫ్ అలీ అనే కుమారుడు ఉన్న సంగతి తెలిసిందే.
