Another Exciting Multistarrer: టాలీవుడ్ లో మరో క్రేజీ మల్టీ స్టారర్ షురూ

Another Exciting Multistarrer: టాలీవుడ్‌లో మరో క్రేజీ మల్టీస్టారర్‌కు గ్రీన్ సిగ్నల్ పడింది! విక్టరీ వెంకటేష్, నందమూరి కళ్యాణ్ రామ్ కాంబినేషన్‌లో.. సక్సెస్‌ఫుల్ డైరెక్టర్ అనిల్ రావిపూడి దర్శకత్వంలో ఓ భారీ చిత్రం రూపొందబోతున్న విషయం తెలిసిందే. అనౌన్స్‌మెంట్ రోజు నుంచే ప్రేక్షకుల్లో విపరీతమైన అంచనాలు రేపుతున్న ఈ క్రేజీ ప్రాజెక్ట్.. గురువారం ఉదయం గ్రాండ్‌గా ప్రారంభమైంది.

హైదరాబాద్‌లోని రామానాయుడు స్టూడియోస్‌లో అత్యంత వైభవంగా జరిగిన పూజా కార్యక్రమాలతో ఈ సినిమాను అధికారికంగా లాంచ్ చేశారు. ఈ సినిమాలో స్టార్ హీరోయిన్ కీర్తి సురేష్, లక్కీ బ్యూటీ కృతి శెట్టి హీరోయిన్లుగా నటిస్తున్నారు. షైన్ స్క్రీన్స్ బ్యానర్‌పై సాహు గారపాటి అత్యంత ప్రతిష్టాత్మకంగా ఈ చిత్రాన్ని నిర్మిస్తుండగా.. సురేష్ ప్రొడక్షన్స్, జీ స్టూడియోస్ సంస్థలు సమర్పిస్తున్నాయి.

ఇక ఈ సినిమా ముహూర్తపు షాట్‌కు టాలీవుడ్ దిగ్గజాలు హాజరై చిత్ర యూనిట్‌కు బెస్ట్ విషెస్ తెలియజేశారు. హీరోహీరోయిన్స్‌పై చిత్రీకరించిన ఫస్ట్ షాట్‌కు స్టార్ ప్రొడ్యూసర్ అల్లు అరవింద్ క్లాప్ కొట్టగా.. సురేష్ బాబు కెమెరా స్విచ్ ఆన్ చేశారు. మన సీనియర్ దర్శకేంద్రుడు కె.రాఘవేంద్రరావు ఈ మొదటి షాట్‌కు గౌరవ దర్శకత్వం వహించడం విశేషం! అలాగే స్టార్ ప్రొడ్యూసర్స్ దిల్ రాజు, శిరీష్ చేతుల మీదుగా దర్శకనిర్మాతలకు స్క్రిప్ట్‌ను అందజేశారు.

త్వరలోనే ఈ సినిమా రెగ్యులర్ షూటింగ్‌ను ప్రారంభించేందుకు సన్నాహాలు చేస్తున్నారు. ఈ క్రేజీ మల్టీస్టారర్‌కు టాలెంటెడ్ కంపోజర్ జీవీ ప్రకాష్ కుమార్ సంగీతం అందిస్తుండగా, సమీర్ రెడ్డి సినిమాటోగ్రాఫర్‌గా వ్యవహరిస్తున్నారు. అనిల్ రావిపూడి మార్క్ ఎంటర్‌టైన్‌మెంట్‌తో తెరకెక్కనున్న ఈ చిత్రాన్ని వచ్చే ఏడాది సంక్రాంతి కానుకగా థియేటర్లలోకి తీసుకురానున్నారు.