Bentley Car: 888 పీఎస్ పవర్, 600కిమీ రేంజ్‌తో బెంట్లీ తొలి ఎలక్ట్రిక్ కారు వచ్చేసింది.. ఫీచర్లు అదుర్స్

Bentley Car: ప్రముఖ బ్రిటిష్ లగ్జరీ కార్ల తయారీ సంస్థ బెంట్లీ ఎలక్ట్రిక్ రంగంలోకి ఘనంగా అడుగుపెట్టింది. తన మొట్టమొదటి పూర్తిగా ఎలక్ట్రిక్ ఎస్‌యూవీ అయిన టార్కల్‎ను కంపెనీ తాజాగా ప్రపంచం ముందుకు తీసుకువచ్చింది. గత 100 సంవత్సరాలకు పైగా బెంట్లీ ఏ లగ్జరీ, క్లాసిక్ డిజైన్‌కు పేరుగాంచిందో, అదే ప్రత్యేకతను ఈ ఎలక్ట్రిక్ కారులోనూ కొనసాగించారు. ఆధునిక ఎలక్ట్రిక్ టెక్నాలజీని జోడిస్తూనే బెంట్లీ సాంప్రదాయ వైభవాన్ని ఉట్టిపడేలా దీన్ని రూపొందించారు.

అద్భుతమైన డిజైన్, స్పెషల్ సౌండ్ అనుభవం

ఎలక్ట్రిక్ కార్లలో సాధారణంగా కూలింగ్ కోసం సాంప్రదాయ గ్రిల్స్ అవసరం ఉండదు. అయినప్పటికీ బెంట్లీ తన టార్కల్ ఎస్‌యూవీలో డైమండ్ షేప్ లైట్లు, ట్రెడిషనల్ ఫ్రంట్ గ్రిల్ డిజైన్‌ను అలాగే ఉంచింది. అంతేకాకుండా డ్రైవింగ్ అనుభూతిని మరింత ఉత్సాహంగా మార్చడానికి V8 ఇంజిన్ లాంటి శబ్దాన్ని ఇమిటేట్ చేసే ప్రత్యేకమైన సౌండ్ సిస్టమ్‌ను ఇందులో ఏర్పాటు చేశారు. ఆర్కెస్ట్రాలో వాడే పెద్ద డ్రమ్స్ శబ్దం ఆధారంగా కారు వేగాన్ని తగినట్లుగా ఈ సౌండ్ మారుతుండటం విశేషం.

పవర్‌ఫుల్ పెర్ఫార్మెన్స్, అదిరిపోయే స్పీడు

ఈ ఎస్‌యూవీ పనితీరు పరంగా అత్యంత శక్తివంతంగా నిలిచింది. బెంట్లీ టార్కల్ ఎస్ వెర్షన్‌లో డ్యూయల్-మోడ్ ఆల్-వీల్ డ్రైవ్ సిస్టమ్‌ను అందించారు. ఇది ఏకంగా 888 PS పవర్, 1,350 Nm టార్క్‌ను ఉత్పత్తి చేస్తుంది. కేవలం 2.9 సెకన్లలోనే ఈ భారీ కారు 0 నుంచి 100 కిమీ/గంట వేగాన్ని అందుకుంటుంది. దీని గరిష్ట వేగం గంటకు 260 కిమీగా ఉంది. అలాగే స్టాండర్డ్ మోడల్ 821 PS పవర్‌తో 3.4 సెకన్లలోనే 100 కిమీ వేగాన్ని చేరుకోగలదు.

బ్యాటరీ సామర్థ్యం, అల్ట్రా-ఫాస్ట్ ఛార్జింగ్

బెంట్లీ టార్కల్ ఎస్‌యూవీలో 113 kWh శక్తివంతమైన బ్యాటరీ ప్యాక్‌ను అమర్చారు. ఇది 800V లిథియం అయాన్ టెక్నాలజీతో పనిచేస్తుంది. పూర్తి ఛార్జ్‌పై ఈ ఎలక్ట్రిక్ కారు దాదాపు 600 కిలోమీటర్ల దూరం ప్రయాణించగలదని కంపెనీ స్పష్టం చేసింది. ఇక ఛార్జింగ్ విషయానికి వస్తే, 400kW అల్ట్రా-ఫాస్ట్ ఛార్జింగ్ సపోర్ట్ ద్వారా కేవలం 16 నిమిషాల్లోనే బ్యాటరీ 10 నుంచి 80 శాతానికి ఛార్జ్ అవుతుంది. కేవలం 7 నిమిషాల ఛార్జింగ్‌తో సుమారు 160 కిమీల ప్రయాణ సౌలభ్యం లభిస్తుంది.

ఉత్పత్తి, గ్లోబల్ మార్కెట్ వ్యూహం

ఈ సరికొత్త ఎలక్ట్రిక్ ఎస్‌యూవీ తయారీ కోసం బ్రిటన్‌లోని క్రూ ప్లాంట్‌లో బెంట్లీ భారీగా 35 కోట్ల పౌండ్లు (సుమారు 46.5 కోట్ల డాలర్లు) పెట్టుబడి పెట్టింది. యూరప్, మిడిల్ ఈస్ట్, అమెరికా దేశాల నుంచి ఈ కారుకు అద్భుతమైన స్పందన లభిస్తోంది. వచ్చిన ఆసక్తిలో దాదాపు సగం మంది కొత్త కస్టమర్లు ఉండటం విశేషం. ఈ ఎలక్ట్రిక్ వాహనంతో బెంట్లీ లగ్జరీ కార్ల మార్కెట్లో సరికొత్త చరిత్ర సృష్టించడానికి సిద్ధమవుతోంది.