Pawan Kalyan: పవన్ కల్యాణ్ రాజీనామా వార్తలపై క్లారిటీ.. ఫేక్ ఛానల్‌పై చర్యలకు సిద్ధం
ఫేక్ ఛానల్‌పై చర్యలకు సిద్ధం
Pawan Kalyan: ఆంధ్రప్రదేశ్ డిప్యూటీ సీఎం పవన్ కల్యాణ్ తన పదవికి రాజీనామా చేయబోతున్నారంటూ సోషల్ మీడియాలో ప్రచారం అవుతున్న వార్తలను ఆయన కార్యాలయం తీవ్రంగా ఖండించింది. పవన్ కల్యాణ్ రాజీనామా చేసి టెలివిజన్ ఛానల్ ప్రారంభించబోతున్నారంటూ జరుగుతున్న ప్రచారంలో ఎలాంటి నిజం లేదని స్పష్టం చేసింది.
గత 24 గంటలుగా పవన్ కల్యాణ్ డిప్యూటీ సీఎం పదవి నుంచి తప్పుకోబోతున్నారంటూ సోషల్ మీడియాలో పలు సందేశాలు విస్తృతంగా వైరల్ అవుతున్నాయి. మరికొన్ని పోస్టుల్లో దీనిపై అధికారిక ప్రకటన త్వరలోనే వెలువడబోతోందంటూ ప్రచారం జరిగింది. దీంతో ఈ వ్యవహారం చర్చనీయాంశంగా మారింది.
‘డిప్యూటీ సీఎంవో, ఆంధ్రప్రదేశ్’ పేరుతో ఉన్న ఓ వాట్సాప్ ఛానల్ ఈ ప్రచారాన్ని వ్యాప్తి చేసినట్లు తెలుస్తోంది. ఈ నేపథ్యంలో పవన్ కల్యాణ్ కార్యాలయం స్పందిస్తూ తీవ్రంగా హెచ్చరించింది. తమ కార్యాలయానికి సంబంధించిన గుర్తింపును అనధికారికంగా ఉపయోగించి తప్పుడు సమాచారాన్ని, సంబంధం లేని కంటెంట్‌ను ప్రచారం చేస్తున్నారని పేర్కొంది.
పవన్ కల్యాణ్ ప్రముఖ తెలుగు సినీ నటుడిగా గుర్తింపు పొందిన అనంతరం రాజకీయాల్లోకి ప్రవేశించి జనసేన పార్టీకి నాయకత్వం వహిస్తున్నారు. 2024 ఆంధ్రప్రదేశ్ అసెంబ్లీ ఎన్నికల్లో జనసేన పార్టీ 21 అసెంబ్లీ స్థానాల్లో విజయం సాధించడంతో ఆయన రాష్ట్ర డిప్యూటీ సీఎంగా బాధ్యతలు చేపట్టారు. ముఖ్యమంత్రి నారా చంద్రబాబు నాయుడు నేతృత్వంలోని కూటమి ప్రభుత్వంలో పవన్ కల్యాణ్ కీలక బాధ్యతలు నిర్వహిస్తున్నారు.
తమ కార్యాలయం పేరును, గుర్తింపును అనుమతి లేకుండా ఉపయోగించి ప్రజలను తప్పుదోవ పట్టించే సమాచారాన్ని ప్రచారం చేయడం ఏమాత్రం ఆమోదయోగ్యం కాదని పవన్ కల్యాణ్ కార్యాలయం స్పష్టం చేసింది. ఇలాంటి వ్యక్తులపై కఠినంగా వ్యవహరిస్తామని హెచ్చరించింది.
అనధికారికంగా కార్యాలయ గుర్తింపును ఉపయోగించి తప్పుడు సమాచారాన్ని ఉద్దేశపూర్వకంగా వ్యాప్తి చేస్తున్న వారిపై చర్యలు తీసుకునేందుకు ఎఫ్‌ఐఆర్ నమోదు ప్రక్రియ ప్రారంభిస్తున్నట్లు పవన్ కల్యాణ్ కార్యాలయం వెల్లడించింది. బాధ్యులపై కఠినమైన చట్టపరమైన చర్యలు తీసుకుంటామని స్పష్టం చేసింది.
