A.R. Rahman: ఇలాంటి సినిమాకు పనిచేయడం ప్రతి సంగీత దర్శకుడి కల - ఏఆర్ రెహమాన్

A.R. Rahman: ఆస్కార్ అవార్డు గ్రహీత, ప్రముఖ సంగీత దర్శకుడు ఏఆర్ రెహమాన్ ఒక అరుదైన చిత్రానికి సంగీతం అందించారు. సంభాషణలు లేకుండా, కేవలం హావభావాలు, నేపథ్య సంగీతంతో నడిచే 'ఉఫ్ యే సియాపా' అనే మూకీ కామెడీ సినిమాకు ఆయన స్వరాలు సమకూర్చారు. ఇలాంటి సినిమాకు పనిచేయడం ప్రతి సంగీత దర్శకుడి కల అని రెహమాన్ అభిప్రాయపడ్డారు. డైలాగులు లేకుండా కేవలం బ్యాక్ గ్రౌండ్ స్కోర్‌తో నడిచే సినిమా చేయడం ఏ కంపోజర్‌కైనా ఒక కల లాంటిది. అందుకే ఈ అవకాశం రాగానే వెంటనే అంగీకరించాను’’ అని రెహమాన్ తన అనుభవాన్ని పంచుకున్నారు. ఒకప్పుడు కమల్ హాసన్ నటించిన 'పుష్పక విమానం' తర్వాత, మళ్లీ ఆ తరహాలో వస్తున్న ఈ చిత్రంపై ప్రేక్షకుల్లో ఆసక్తి నెలకొంది.

ఈ ప్రాజెక్ట్ గురించి వివరిస్తూ..‘‘దర్శకుడు జి. అశోక్ కథను వివరించిన తీరు నన్ను బాగా ఆకట్టుకుంది. ఆయనకు సినిమాపై పూర్తి నమ్మకం ఉంది. నేను ముందుగా కొన్ని ఐడియాలు, రెండు పాటలు ఇచ్చాను. ఆ తర్వాత సినిమా చూసి, మరికొన్నింటిని కంపోజ్ చేశాను. కొన్ని సన్నివేశాలకు ఫ్రేమ్-టు-ఫ్రేమ్ సింక్ అయ్యేలా సంగీతం అందించగా, మరికొన్ని చోట్ల సాధారణ శైలిని అనుసరించాను’’ అని రెహమాన్ తెలిపారు.

ఉఫ్ యే సియాపా' కథ

సోహమ్ షా, నుష్రత్ భరుచా, నోరా ఫతేహి ప్రధాన పాత్రల్లో నటించిన 'ఉఫ్ యే సియాపా' పొరపాట్లతో నడిచే కామెడీ కథ. కేసరి లాల్ సింగ్ అనే సామాన్య వ్యక్తి, తన భార్య అపార్థం కారణంగా చిక్కుల్లో పడతాడు. పొరుగింటి అమ్మాయితో సంబంధం అంటగట్టడంతో ఆమె ఇల్లు విడిచి వెళ్ళిపోతుంది. ఈ గందరగోళం సరిదిద్దుకునేలోపే, అనుకోకుండా వచ్చిన ఓ డ్రగ్స్ పార్శిల్, ఇంట్లో శవాలు ప్రత్యక్షమవడం వంటి సంఘటనలతో అతని జీవితం తలకిందులవుతుంది. ఈ సమస్యల నుంచి కేసరి ఎలా బయటపడ్డాడన్నదే ఈ సినిమా ప్రధాన కథాంశం.