Crazy Update from Ram Charan’s ‘Peddi’: రామ్ చరణ్ పెద్ది నుండి క్రేజీ అప్‌డేట్.. హెల్లల్లల్లో సాంగ్ ప్రోమో అవుట్.. శృతి హాసన్‌తో గ్లోబల్ స్టార్ మాస్ స్టెప్పులు..

Crazy Update from Ram Charan’s ‘Peddi’: గ్లోబల్ స్టార్ రామ్ చరణ్ పెద్దిపై అంచనాలు ఆకాశాన్నంటుతున్నాయి. ఉప్పెన ఫేమ్ దర్శకుడు బుచ్చిబాబు సానా గ్రామీణ క్రీడా నేపథ్యంలో తెరకెక్కిస్తున్న ఈ భారీ ప్రాజెక్ట్ కోసం మెగా అభిమానులు ఎంతో ఉత్కంఠగా ఎదురుచూస్తున్నారు. సినిమా విడుదల తేదీ దగ్గరపడుతుండటంతో ప్రచార కార్యక్రమాల్లో వేగం పెంచిన చిత్రబృందం.. తాజాగా అభిమానులకు ఒక అదిరిపోయే సర్‌ప్రైజ్ ఇచ్చింది. ఈ సినిమాలోని మోస్ట్ అవేటెడ్ ప్రత్యేక గీతం హెల్లల్లల్లోకు సంబంధించిన ప్రోమోను విడుదల చేసింది.

రామ్ చరణ్, శృతి హాసన్ డ్యాన్స్ కిక్:

తాజాగా విడుదలైన హెల్లల్లల్లో పాటలో రామ్ చరణ్, శృతి హాసన్ తమ అద్భుతమైన డ్యాన్స్ స్టెప్పులతో రచ్చ చేశారు. వీరిద్దరి కెమిస్ట్రీ, ఎనర్జిటిక్ మూమెంట్స్ అభిమానులకు మంచి కిక్ ఇస్తున్నాయి. ఈ ప్రత్యేక గీతం పూర్తి ఆడియో, వీడియోను రేపు భోపాల్‌లో భారీ స్థాయిలో నిర్వహించనున్న ఒక ప్రత్యేక వేడుకలో అధికారికంగా విడుదల చేయనున్నారు. ఈ ఈవెంట్‌కు ముందే ప్రోమోను వదలడంతో సాంగ్ పై అంచనాలు రెట్టింపు అయ్యాయి.

రెహమాన్ మ్యాజిక్ - అనంత శ్రీరామ్ సాహిత్యం:

ఆస్కార్ విజేత, సంగీత దిగ్గజం ఏ.ఆర్. రెహమాన్ ఈ చిత్రానికి స్వరాలు సమకూర్చడం విశేషం. రెహమాన్ మార్క్ మ్యూజిక్‌కు తోడు ప్రముఖ గేయ రచయిత అనంత శ్రీరామ్ ఈ పాటకు మాస్ లైన్స్ అందించారు. ఈ ప్రత్యేక గీతానికి సంబంధించి సోషల్ మీడియాలో ఒక ఆసక్తికరమైన ప్రచారం సాగుతోంది. ఈ పాటలో శృతి హాసన్‌తో పాటు టాలీవుడ్‌కు చెందిన మరో టాప్ హీరోయిన్ కూడా మెరవబోతోందని, ఆమె ఎవరనే విషయాన్ని చిత్రబృందం ఇప్పటివరకు అత్యంత రహస్యంగా ఉంచిందని టాక్. ఈ సస్పెన్స్ రేపటి వేడుకతో వీడనుంది.

జూన్ 4న ప్రపంచవ్యాప్తంగా గ్రాండ్ రిలీజ్..

భారీ నిర్మాణ విలువలతో వృద్ధి సినిమాస్ పతాకంపై నిర్మితమవుతున్న ఈ చిత్రాన్ని మైత్రీ మూవీ మేకర్స్, సుకుమార్ రైటింగ్స్ సంస్థలు సంయుక్తంగా సమర్పిస్తున్నాయి. ఈ చిత్రంలో కన్నడ స్టార్ శివరాజ్ కుమార్, జగపతి బాబు, బొమన్ ఇరానీ, దివ్యేందు శర్మ వంటి పలువురు ప్రముఖ నటులు కీలక పాత్రల్లో నటిస్తున్నారు. ఇప్పటికే అన్ని కార్యక్రమాలను పూర్తి చేసుకున్న పెద్ది చిత్రం జూన్ 4న ప్రపంచవ్యాప్తంగా థియేటర్లలోకి రాబోతోంది.