Mouni Roy Shares Emotional Post: విడాకుల రూమర్లు: 'మా ప్రైవసీని గౌరవించండి' అంటూ మౌనీ రాయ్ ఎమోషనల్ పోస్ట్

Mouni Roy Shares Emotional Post: గత కొన్ని రోజులుగా బాలీవుడ్ నటి మౌనీ రాయ్ వ్యక్తిగత జీవితం గురించి సోషల్ మీడియాలో రకరకాల వార్తలు చక్కర్లు కొడుతున్నాయి. ఆమె తన భర్త సూరజ్ నంబియార్‌తో విడిపోతున్నారనే ప్రచారం జోరందుకుంది. దీనికి ప్రధాన కారణం ఏమిటంటే, వీరిద్దరూ ఇన్‌స్టాగ్రామ్‌లో ఒకరినొకరు అన్‌ఫాలో చేసుకోవడం అభిమానుల దృష్టిలో పడింది. అంతేకాకుండా మౌనీ రాయ్ ప్రాణ స్నేహితురాలు, నటి దిశా పటానీ కూడా సూరజ్‌ను అన్‌ఫాలో చేయడం, ఆ వెంటనే సూరజ్ తన ఇన్‌స్టాగ్రామ్ ఖాతాను ఏకంగా డిలీట్ చేయడంతో ఈ అనుమానాలు మరింత బలపడ్డాయి.

ఈ పుకార్లపై మౌనీ రాయ్ చివరకు మౌనం వీడారు. బుధవారం తన ఇన్‌స్టాగ్రామ్ స్టోరీలో ఒక ప్రకటన చేస్తూ, తన వ్యక్తిగత విషయంపై వస్తున్న తప్పుడు వార్తలను నమ్మవద్దని కోరారు. "మీడియా సంస్థలన్నింటికీ నా విన్నపం.. దయచేసి మా గురించి తప్పుడు కథనాలను ప్రచురించకండి. మాకు కొంత సమయం, ప్రైవసీని ఇవ్వండి" అంటూ చేతులు జోడించి వేడుకున్నారు. తమ వ్యక్తిగత జీవితం గురించి చర్చలు ఆపాలని ఆమె విజ్ఞప్తి చేశారు.

సాధారణంగా మౌనీ రాయ్, సూరజ్ జంట సోషల్ మీడియాలో చాలా యాక్టివ్‌గా ఉండేవారు. ఒకరిపై ఒకరికి ఉన్న ప్రేమను ఫొటోల ద్వారా తరచుగా పంచుకునేవారు. అయితే ఇప్పుడు అకస్మాత్తుగా జరిగిన ఈ మార్పులు అందరినీ ఆశ్చర్యానికి గురిచేశాయి. ప్రస్తుతానికి మౌనీ తన ఇన్‌స్టాగ్రామ్‌లో పెళ్లి ఫొటోలను అలాగే ఉంచినప్పటికీ, సూరజ్ తన ఖాతాను తీసేయడం చర్చనీయాంశంగా మారింది.

వీరిద్దరి ప్రేమ ప్రయాణం 2018లో దుబాయ్‌లో జరిగిన ఒక న్యూ ఇయర్ వేడుకలో మొదలైంది. స్నేహితుల ద్వారా పరిచయమైన వీరు, కొంతకాలం పాటు లాంగ్ డిస్టెన్స్ రిలేషన్‌షిప్‌లో ఉన్నారు. సూరజ్ దుబాయ్‌లో ఉండగా, మౌనీ ముంబైలో ఉండేవారు. ఒకరిని ఒకరు కలుసుకోవడానికి తరచుగా ప్రయాణాలు చేసేవారు. 2022లో గోవా వేదికగా మలయాళ, బెంగాలీ పద్ధతుల్లో వీరి వివాహం ఘనంగా జరిగింది. పెళ్లికి ముందు తన ప్రేమ విషయంపై ఎప్పుడూ స్పందించని మౌనీ, పెళ్లి తర్వాత "చివరికి అతడిని కనుగొన్నాను" అంటూ తన సంతోషాన్ని పంచుకున్నారు.

మౌనీ రాయ్ కెరీర్ విషయానికి వస్తే, ఆమె 'క్యుంకీ సాస్ భీ కభీ బహు థీ' సీరియల్‌తో మంచి గుర్తింపు తెచ్చుకున్నారు. ఆ తర్వాత 'దేవోం కే దేవ్... మహాదేవ్', 'నాగిన్' వంటి పాపులర్ షోలతో దేశవ్యాప్తంగా అభిమానులను సంపాదించుకున్నారు. సినిమాల్లో కూడా అక్షయ్ కుమార్‌తో 'గోల్డ్', 'మేడ్ ఇన్ చైనా' వంటి చిత్రాల్లో నటించారు. ముఖ్యంగా అయాన్ ముఖర్జీ దర్శకత్వంలో వచ్చిన 'బ్రహ్మాస్త్ర' సినిమాలో ఆమె పోషించిన విలన్ పాత్రకు మంచి ప్రశంసలు దక్కాయి. ఇప్పుడు ఇలాంటి క్లిష్ట సమయంలో తన ప్రైవసీని కాపాడాలని ఆమె కోరుతున్నారు.