Dulquer Salmaan: సుమంత్ ప్రభాస్, అల్లరి నరేష్‌లతో బాక్సాఫీస్ పోరుకు సిద్ధమైన దుల్కర్ సల్మాన్

Dulquer Salmaan: దుల్కర్ సల్మాన్ కథానాయకుడిగా నటిస్తూ, స్వీయ నిర్మాణంలో తెరికెక్కించిన మలయాళ చిత్రం "ఐయామ్ గేమ్" (I’m Game) విడుదల వాయిదా పడటంతో, సెప్టెంబర్ మొదటి వారంలో తెలుగు బాక్సాఫీస్ వద్ద ఆసక్తికరమైన పోటీ నెలకొననుంది.

వాస్తవానికి "ఐయామ్ గేమ్" చిత్రం ఆగస్టు 20న ప్రేక్షకుల ముందుకు రావాల్సి ఉండగా, మేకర్స్ దీని విడుదలను సెప్టెంబర్ 3, 2026కి వాయిదా వేస్తున్నట్లు ప్రకటించారు. ఈ సినిమాను మరింత భారీ స్థాయిలో, విస్తృత పరిధిలోకి తీసుకెళ్లేందుకే ఈ నిర్ణయం తీసుకున్నట్లు తెలిపారు. ఈ చిత్రాన్ని మలయాళంతో పాటు తెలుగు, తమిళం, హిందీ మరియు కన్నడ భాషల్లో ఒకేసారి భారీ ఎత్తున పాన్-ఇండియా రేంజ్‌లో విడుదల చేయబోతున్నారు.

అయితే కొత్త విడుదల తేదీ ప్రకారం, తెలుగు మార్కెట్‌లో దుల్కర్ సల్మాన్‌కు యువ నటుడు సుమంత్ ప్రభాస్ మరియు అల్లరి నరేష్‌ పోటీగా నిలవనున్నారు.

సందీప్ రెడ్డి వంగా సమర్పణలో సుమంత్ ప్రభాస్, అనంతిక జంటగా నటించిన రొమాంటిక్ డ్రామా 'రోమాంచకం' సెప్టెంబర్ 3న థియేటర్లలోకి రానుంది. మరోవైపు, మరుసటి రోజు అనగా సెప్టెంబర్ 4న, అల్లరి నరేష్ మార్క్ అవుట్ అండ్ అవుట్ ఫాంటసీ కామెడీ ఎంటర్‌టైనర్ 'రంభ ఊర్వశి మేనక' విడుదల కాబోతోంది. ఇటీవల విడుదలైన ఈ చిత్ర టీజర్‌కు విశేష స్పందన లభించగా, విష్ణుప్రియ, రాశి సింగ్, మరియు ప్రీషా సింగ్‌లు దేవకన్యలుగా నటిస్తున్న ఈ సినిమాతో అల్లరి నరేష్ మళ్లీ కామెడీ ట్రాక్‌లోకి అడుగుపెడుతుండటం విశేషం.