Vijay Sethupathi: డబ్బు కోసమే రంగుల ప్రపంచంలోకి వచ్చా.. విజయ్ సేతుపతి ఎమోషనల్..

Vijay Sethupathi: విజయ్ సేతుపతి ఈరోజు కోట్లాది మంది అభిమానించే స్టార్ హీరో కావచ్చు. కానీ ఆయన గతం మాత్రం కన్నీళ్లు, కష్టాలతో నిండినదే. చిన్నతనంలో తన కుటుంబం ఎదుర్కొన్న ఆర్థిక ఇబ్బందుల గురించి ఆయన ఇంటర్వ్యూలో గుర్తుచేసుకుంటూ భావోద్వేగానికి గురయ్యారు. "చిన్నప్పుడు మా కుటుంబం తీవ్రమైన అప్పుల్లో ఉండేది. మా చదువులు, అవసరాల కోసమే మా నాన్న చాలా అప్పులు చేశారు. అవి తీర్చలేక ఆయన పడే బాధ వర్ణనాతీతం. కొన్నిసార్లు అప్పులవాళ్లు మా ఇంటికొచ్చి గొడవ చేసేవారు. ఆ సమయంలో మా నాన్న ఒంటరిగా ఫీల్ అవ్వకూడదని, ఆయనకు ధైర్యంగా నేను ఎప్పుడూ పక్కనే కూర్చునేవాడిని" అని విజయ్ సేతుపతి చెప్పుకొచ్చారు.

ఆ ఫ్రైడ్ రైస్ జ్ఞాపకం ఎప్పటికీ మర్చిపోలేను

ఎన్ని కష్టాలున్నా తమ సంతోషాన్ని నాన్న దూరం చేయలేదని సేతుపతి అన్నారు. ప్రతిరోజు రాత్రి 9.30 గంటలకు నాన్న తన బుల్లెట్ బండిపై వస్తూ ఫ్రైడ్ రైస్ తెచ్చేవారని.. కుటుంబమంతా కలిసి ఆ కొద్దిపాటి ఆహారాన్ని పంచుకుని తిన్న క్షణాలు తన జీవితంలోనే అత్యంత మధురమైన జ్ఞాపకాలని ఆయన గుర్తుచేసుకున్నారు.

డబ్బు కోసమే రంగుల ప్రపంచంలోకి..

నిజానికి విజయ్ సేతుపతికి నటుడు అవ్వాలనే లక్ష్యం అస్సలు లేదు. కేవలం కుటుంబ బాధ్యతలు భుజాన వేసుకోవడం, అప్పులు తీర్చడం కోసమే ఆయన సినిమా రంగాన్ని ఎంచుకున్నారు. సినిమాల్లోకి రాకముందు ఆయన చేయని పని లేదు.

స్కూల్ రోజుల్లోనే కూలీ పనులకు వెళ్లారు.

రిటైల్ స్టోర్‌లో సేల్స్‌మ్యాన్‌గా బాధ్యతలు నిర్వహించారు.

ఫాస్ట్‌ఫుడ్ సెంటర్‌లో క్యాషియర్‌గా, ఫోన్ బూత్ ఆపరేటర్‌గా పనిచేశారు.

ఆ తర్వాత కుటుంబానికి ఆసరాగా ఉండటానికి దుబాయ్‌ వెళ్ళి అక్కడ అకౌంటెంట్‌గానూ ఉద్యోగం చేశారు.

జీవితాన్ని మార్చేసిన నాటకరంగం

దుబాయ్ నుంచి తిరిగొచ్చిన తర్వాత థియేటర్ ఆర్టిస్టులతో ఏర్పడిన పరిచయమే ఆయన కెరీర్‌ను మలుపు తిప్పింది. మొదట్లో తెరపై కేవలం కొన్ని సెకన్ల పాటు కనిపించే చిన్న చిన్న పాత్రలు చేశారు. ఆ తర్వాత తెన్మేర్కు పరువకాట్రు చిత్రంతో హీరోగా మారి.. పిజ్జా, సూదు కవ్వమ్, విక్రమ్ వేద, మహారాజా వంటి విలక్షణమైన సినిమాలతో వర్సటైల్ స్టార్‌గా ఎదిగారు.

ప్రస్తుతం ఈ మక్కల్ సెల్వన్ నటించిన ట్రైన్, స్లమ్ డాగ్ చిత్రాలు విడుదలకు సిద్ధంగా ఉన్నాయి. శూన్యం నుంచి మొదలై శిఖరానికి చేరిన విజయ్ సేతుపతి రియల్ లైఫ్ స్టోరీ నిజంగా ప్రతి ఒక్కరికీ స్ఫూర్తిదాయకం.