సినీ ప్రపంచానికి అనుగుణంగా “నేను మారిపోయాను”- రామ్ గోపాల్ వర్మ

దర్శకుడు రామ్ గోపాల్ వర్మ (Ram Gopal Varma) పుట్టినరోజు వేడుక ఈసారి ఎంతో ప్రత్యేకంగా జరిగింది. సాధారణంగా ఆయన తన పుట్టినరోజులను జరుపుకోరు. కానీ ఈసారి మొదటిసారిగా ఘనంగా జరుపుకోవడం అందరినీ ఆశ్చర్యపరిచింది. ఈ వేడుక కేవలం పుట్టినరోజు సంబరంగా మాత్రమే కాకుండా, మారుతున్న సినీ ప్రపంచం, కొత్త ఆలోచనలు, సృజనాత్మకతకు ప్రతీకగా నిలిచింది.

రామ్ గోపాల్ వర్మ అనేక మంది దర్శకులకు గురువుగా నిలిచారు. ఆయన శిష్యుడైన ప్రదీప్ ఖైర్వార్ (Good Idea Films సంస్థ వ్యవస్థాపకుడు, దర్శకుడు, నిర్మాత) ఈ వేడుకను ఎంతో వైభవంగా నిర్వహించారు. ఇటీవల ఆయన నిర్మించిన “ఆయుష్మతి గీతా మ్యాట్రిక్ పాస్” సినిమా OTTలో విడుదలైంది. తన గురువుకి కృతజ్ఞతగా ఈ వేడుకను ఏర్పాటు చేశారు.

ఈ వేడుకలో సినీ పరిశ్రమకు చెందిన ప్రముఖులు పెద్ద సంఖ్యలో పాల్గొన్నారు. ప్రముఖ నటులు, దర్శకులు, నిర్మాతలు, రచయితలు అందరూ ఒకే వేదికపై కనిపించారు. ఈ సందర్భంగా సినిమా భవిష్యత్తు, కథన శైలిలో మార్పులు, కొత్త తరానికి సంబంధించిన ఆలోచనలు చర్చకు వచ్చాయి.

రామ్ గోపాల్ వర్మ ఈ సందర్భంగా మాట్లాడుతూ, “నేను ఎప్పుడూ పుట్టినరోజులు జరుపుకోను. కానీ ఈసారి కొత్తగా ఏదో చేయాలని అనిపించింది. సినిమా రంగం మారుతోంది, నేను కూడా ఆ మార్పులతో పాటు మారుతున్నానని తెలిపారు. ఆయన మాటల్లో కొత్త ఉత్సాహం కనిపించింది.

ఈ వేడుకలో పాల్గొన్న హీరోయిన్ ఇషా కొప్పికర్ తన ఆనందాన్ని వ్యక్తం చేశారు. ఆమె మాట్లాడుతూ “రాము గారు మొదటిసారి తన పుట్టినరోజు జరుపుకోవడం నాకు చాలా సంతోషంగా ఉంది. నేను ఆయనతో చాలా సంవత్సరాలుగా పని చేస్తున్నాను. ఆయన ఎప్పుడూ ఇలాంటి పార్టీలు పెట్టలేదు. ఈ రోజు ఇక్కడ ఉండటం నాకు చాలా ప్రత్యేకంగా అనిపిస్తోందని చెప్పారు.

ఆమె తన కెరీర్ గురించి మాట్లాడుతూ, “నా ‘ఖల్లాస్’ పాటను రాము గారు పరిచయం చేశారు. ఆ పాట వల్లే నాకు ‘ఖల్లాస్ గర్ల్’ అనే పేరు వచ్చింది. అది నా కెరీర్‌లో ఎంతో ముఖ్యమైన మైలురాయి” అని గుర్తుచేసుకున్నారు. ఇంకా రాము గారితో మళ్లీ పని చేస్తున్నానని, కానీ ఆ ప్రాజెక్ట్ గురించి వివరాలు ఇప్పుడే చెప్పలేనని తెలిపారు.

సినిమాలో వచ్చిన మార్పుల గురించి మాట్లాడుతూ, “ఇప్పుడు హీరో, హీరోయిన్, విలన్ అనే విభజనలు తగ్గిపోయాయి. ప్రతి పాత్రకీ తనకంటూ ప్రాముఖ్యత ఉంది. ఇప్పుడు ప్రతి ఒక్కరూ హీరోలే. కథలో ప్రతి పాత్ర గుర్తుండేలా దర్శకులు రూపొందిస్తున్నారని చెప్పారు.

ఇప్పటి ప్రేక్షకులు ప్రపంచవ్యాప్తంగా ఉన్న సినిమాలను ఒకే వేదికపై చూస్తున్నారు. అందువల్ల కథ చెప్పే విధానం, పాత్రల రూపకల్పనలో చాలా మార్పులు వచ్చాయని ఆమె అభిప్రాయపడ్డారు. చివరిగా, “రాము గారు మళ్లీ బాలీవుడ్‌లోకి రావాలి. ఆయన నుంచి ఇంకా మంచి సినిమాలు రావాలని ఆశిస్తున్నట్లు చెప్పారు. ఆయన నుంచి మరో సర్ప్రైజ్ తప్పకుండా ఉంటుందని ధీమా వ్యక్తం చేశారు.

ఈ వేడుకను నిర్వహించిన ప్రదీప్ ఖైర్వార్, షెఫాలి సింగ్ రాజ్‌పుత్ వారి అభిప్రాయాలను పంచుకున్నారు. వారు మాట్లాడుతూ, “ఇది కేవలం పుట్టినరోజు వేడుక కాదు. భారతీయ సినీ రంగాన్ని కొత్త దారిలో నడిపించిన ఒక గొప్ప దర్శకుడిని గౌరవించే సందర్భం. మేము నమ్మే కొత్త తరహా కథలు, సృజనాత్మకతను ఈ వేడుక ప్రతిబింబిస్తుందని తెలిపారు. మొత్తానికి, ఈ వేడుక రామ్ గోపాల్ వర్మ వ్యక్తిత్వాన్ని మాత్రమే కాకుండా, మారుతున్న సినీ ప్రపంచాన్ని కూడా ప్రతిబింబించింది. కొత్త ఆలోచనలు, కొత్త కథలు, కొత్త తరానికి మార్గం చూపేలా ఈ వేడుక నిలిచింది.