Chiranjeevi: ఆయన చివరి మాటలు నాతోనే పంచుకున్నారు.. జీవీ నారాయణరావు మరణంపై చిరంజీవి భావోద్వేగం

Chiranjeevi: సీనియర్ నటుడు జీవీ నారాయణరావు మృతి టాలీవుడ్‌ను శోకసంద్రంలో ముంచింది. ఆయన అంత్యక్రియల్లో పాల్గొన్న మెగాస్టార్ చిరంజీవి, మిత్రుడి భౌతికకాయానికి నివాళులర్పించి కుటుంబ సభ్యులకు ప్రగాఢ సానుభూతి తెలిపారు. ఈ సందర్భంగా 1977 నాటి రోజులను, ఇటీవల జరిగిన చివరి సమావేశాన్ని చిరంజీవి గుర్తుచేసుకున్నారు. 1977లో ఫిల్మ్ ఇన్‌స్టిట్యూట్‌లో చదువుకుంటున్న సమయంలో జీవీ నారాయణరావు సీనియర్‌గా ఉంటూ, తమకు ఎన్నో మెళకువలు నేర్పి ఎంతో సన్నిహితంగా ఉండేవారని చిరంజీవి చెప్పారు. వెండితెరకు పరిచయమయ్యాక ఇద్దరూ కలిసి నటించినప్పటికీ, కాలక్రమంలో కెరీర్ బాధ్యతల వల్ల కాస్త దూరమయ్యామని తెలిపారు.

చివరి క్షణాల్లో కథా చర్చ.. ఒక అద్భుతమైన జ్ఞాపకం

సరిగ్గా పది రోజుల క్రితమే తామిద్దరూ కలిసి నటించిన క్లాసిక్ మూవీ 'మంచు పల్లకి'ని చిరంజీవి మళ్లీ వీక్షించారు. అదే సమయంలో జీవీ నారాయణరావు చిరంజీవిని కలిసి..మంచు పల్లకి స్ఫూర్తితో ఐదుగురు నూతన నటీనటులతో రూపొందించిన కొత్త కథను వివరించారు. ఆ కథా చర్చ ముగిసిన తర్వాత ఇద్దరూ కలిసి ఆత్మీయంగా ఫొటో దిగారని, బహుశా తన అంతిమ ఆలోచనలను, ఆశయాలను తనతో పంచుకోవడానికే ఆయన వచ్చారేమోనని చిరంజీవి కంటతడి పెట్టారు. దేనికీ వెరవని ధైర్యం, రాజీపడని దృఢ సంకల్పం జీవీ సొంతమని కొనియాడుతూ ఆయన పవిత్ర ఆత్మకు శాంతి చేకూరాలని కోరుకున్నారు.