Mana Shankara Varaprasad Garu: బాక్సాఫీసును షేక్ చేస్తో్న్న మన శంకర వరప్రసాద్ గారు

Mana Shankara Varaprasad Garu: మెగాస్టార్ చిరంజీవి కథానాయకుడిగా నటించిన హోల్‌సమ్ ఫ్యామిలీ ఎంటర్‌టైనర్ 'మన శంకర వరప్రసాద్ గారు' బాక్సాఫీస్ వద్ద అప్రతిహతమైన వేగంతో దూసుకుపోతోంది. సంక్రాంతి కానుకగా విడుదలైన ఈ చిత్రం ప్రీమియర్ షోల నుంచే రికార్డులను తిరగరాస్తూ, మొదటి రోజు నుంచే తన సత్తాను చాటుతోంది. తాజాగా ఈ సినిమా బుక్‌మైషో ప్లాట్‌ఫారమ్‌లో ఏకంగా 1 మిలియన్ (10 లక్షల) ఆన్‌లైన్ టికెట్ విక్రయాల మార్కును అందుకుని అరుదైన ఘనతను సాధించింది. ఒక క్లీన్ ఫ్యామిలీ ఎంటర్‌టైనర్ ఇంత తక్కువ సమయంలో ఈ మైలురాయిని చేరుకోవడం ట్రేడ్ వర్గాలను సైతం ఆశ్చర్యానికి గురిచేస్తోంది.

దర్శకుడు అనిల్ రావిపూడి తనదైన శైలిలో వినోదాన్ని మేళవించి తెరకెక్కించిన ఈ చిత్రం, ముఖ్యంగా కుటుంబ ప్రేక్షకులను థియేటర్లకు రప్పించడంలో విజయవంతమైంది. సంక్రాంతి పండుగ వాతావరణానికి తగినట్లుగా ఉండటంతో అన్ని వయసుల వారు ఈ సినిమా పట్ల మక్కువ చూపుతున్నారు. దీని ప్రభావం బాక్సాఫీస్ వసూళ్లపై స్పష్టంగా కనిపిస్తోంది. అడ్వాన్స్ బుకింగ్స్ కూడా చాలా బలంగా ఉండటంతో లాంగ్ రన్‌లో ఈ సినిమా భారీ వసూళ్లను సాధించే అవకాశం ఉందని విశ్లేషకులు భావిస్తున్నారు.

కేవలం స్వదేశంలోనే కాకుండా, విదేశీ మార్కెట్‌లో కూడా మెగాస్టార్ తన బాక్సాఫీస్ స్టామినాను నిరూపించుకుంటున్నారు. ఉత్తర అమెరికాలో ఈ చిత్రం ఇప్పటికే $1.7 మిలియన్ల మార్కును దాటేసింది. ప్రస్తుత వేగాన్ని చూస్తుంటే మరో రెండు రోజుల్లోనే ఇది $2 మిలియన్ల మార్కును సునాయాసంగా దాటుతుందని అంచనా వేస్తున్నారు. సెలవులు కొనసాగుతుండటంతో థియేటర్ల వద్ద సందడి మరింత పెరిగే అవకాశం ఉంది, తద్వారా ఈ సినిమా సంక్రాంతి రేసులో మెగా బ్లాక్‌బస్టర్‌గా నిలవడం ఖాయంగా కనిపిస్తోంది.