‘Chennai Love Story’ Movie: మణిశర్మ మ్యూజిక్.. కిరణ్ అబ్బవరం మార్క్ లవ్: ‘చెన్నై లవ్ స్టోరీ’పై భారీ అంచనాలు!

‘Chennai Love Story’ Movie: కిరణ్ అబ్బవరం, శ్రీ గౌరి ప్రియ జంటగా నటిస్తున్న తాజా చిత్రం 'చెన్నై లవ్ స్టోరీ'. ‘కలర్ ఫోటో’, ‘బేబీ’ వంటి బ్లాక్ బస్టర్ చిత్రాలను అందించిన ఎస్.కే.ఎన్, సాయి రాజేష్ ఈ సినిమాను నిర్మిస్తుండటంతో ప్రేక్షకుల్లో భారీ అంచనాలు ఉన్నాయి. రవి నంబూరి దర్శకత్వం వహిస్తున్న ఈ సినిమా షూటింగ్ దాదాపు పూర్తి కావస్తోంది. తాజాగా ఈ సినిమాలోని “గుర్తుందా” అనే సాంగ్‌ను హైదరాబాద్‌లో ఘనంగా విడుదల చేశారు.

ఈ పాట విడుదల కార్యక్రమంలో హీరో కిరణ్ అబ్బవరం సినిమాపై తనకున్న నమ్మకాన్ని గట్టిగా చాటుకున్నారు. ఈ సినిమాను సాంకేతికంగా చాలా ఉన్నత ప్రమాణాలతో, ముఖ్యంగా డాల్బీ సౌండ్ సిస్టమ్‌తో అద్భుతంగా రూపొందిస్తున్నామని ఆయన చెప్పారు. చిత్ర యూనిట్ అంతా కలిసి ఎంతో కష్టపడి ఈ సినిమాను తెరకెక్కించారని ఆయన ప్రశంసించారు.

ముఖ్యంగా ఈ సినిమాకు మణిశర్మ అందించిన సంగీతం ఒక పెద్ద ప్లస్ పాయింట్ కానుందని కిరణ్ అబ్బవరం అన్నారు. సినిమాలో మొత్తం ఏడు పాటలు ఉంటాయని, అవన్నీ ప్రేక్షకులకు ఒక సరికొత్త అనుభూతిని ఇస్తాయని తెలిపారు. ఈ కథ ప్రతి ఒక్కరి మనసుకి హత్తుకుంటుందని చెబుతూ.. “భారతీయ చలనచిత్ర చరిత్రలోనే ఇది ఒక గొప్ప ప్రేమకథగా నిలిచిపోతుంది” అంటూ ఆయన ఒక భారీ స్టేట్‌మెంట్ ఇచ్చారు.

సంగీత దర్శకుడు మణిశర్మ కూడా ఈ ప్రాజెక్ట్ పట్ల చాలా ఉత్సాహంగా ఉన్నారు. తమ కలయికలో అద్భుతమైన పాటలు కుదిరాయని, ఈ మ్యూజిక్‌ను థియేటర్లలో పెద్ద స్క్రీన్ మీద వింటేనే ఆ మజా తెలుస్తుందని ఆయన చెప్పుకొచ్చారు. అమృత ప్రొడక్షన్స్, మాస్ మూవీ మేకర్స్ సంయుక్తంగా నిర్మిస్తున్న ఈ సినిమా త్వరలోనే ప్రేక్షకుల ముందుకు రానుంది.