Kishkindhapuri: యంగ్ హీరో బెల్లంకొండ సాయి శ్రీనివాస్, అనుపమ పరమేశ్వరన్ జంటగా నటించిన చిత్రం కిష్కింధపురికి మెగాస్టార్ చిరంజీవి నుంచి అనూహ్యమైన ప్రశంసలు లభించాయి. ఇటీవల విడుదలైన ఈ సినిమాపై తన అభిప్రాయాలను పంచుకుంటూ చిరంజీవి విడుదల చేసిన ఒక వీడియో ఇప్పుడు సోషల్ మీడియాలో వైరల్‌గా మారింది.
చిరంజీవి వ్యాఖ్యలు:
సినిమా తనకు బాగా నచ్చిందని చిరంజీవి తెలిపారు. ఇది కేవలం ఒక సాధారణ హారర్ థ్రిల్లర్ కాదని, దర్శకుడు కౌశిక్ పగళ్ళపాటి ఎంచుకున్న సైకలాజికల్ యాంగిల్ చాలా కొత్తగా, ఆసక్తికరంగా ఉందని కొనియాడారు. బెల్లంకొండ సాయి శ్రీనివాస్, అనుపమ పరమేశ్వరన్ తమ పాత్రలకు పూర్తి న్యాయం చేశారని, వారి నటన చాలా బాగుందని మెచ్చుకున్నారు. సినిమా సాంకేతిక అంశాలను కూడా చిరంజీవి ప్రస్తావించారు. చైతన్ భరద్వాజ్ అందించిన పాటలు, నేపథ్య సంగీతం సినిమాకు మంచి ఎనర్జీ ఇచ్చాయని తెలిపారు. అలాగే తన తదుపరి చిత్రం శివ శంకర వరప్రసాద్ గారుకు నిర్మాతలుగా ఉన్న సాహు గారపాటి ఈ సినిమాకు మద్దతు ఇవ్వడం సంతోషంగా ఉందన్నారు.
ఇలాంటి కొత్త ప్రయత్నాన్ని అందరూ ఆదరించి, థియేటర్లలో చూసి ప్రోత్సహించాలని చిరంజీవి ప్రేక్షకులను కోరారు. ప్రస్తుతం ఈ సినిమాకు మంచి స్పందన వస్తుండగా, మెగాస్టార్ ప్రశంసలతో రాబోయే రోజుల్లో వసూళ్లు మరింత పెరిగే అవకాశం ఉందని సినీ విశ్లేషకులు అంచనా వేస్తున్నారు.
