Shankar Varaprasad: మెగాస్టార్ బుల్లితెర సునామీ.. టీఆర్పీ రేటింగ్లో రికార్డు సృష్టించిన మన శంకరవరప్రసాద్ గారు
టీఆర్పీ రేటింగ్లో రికార్డు సృష్టించిన మన శంకరవరప్రసాద్ గారు
Shankar Varaprasad: బాక్సాఫీస్ వద్ద కలెక్షన్ల సునామీ సృష్టించిన మెగాస్టార్ చిరంజీవి లేటెస్ట్ సెన్సేషన్ మన శంకరవరప్రసాద్ గారు ఇప్పుడు బుల్లితెరపై కూడా తన జైత్రయాత్రను కొనసాగిస్తోంది. ఇటీవల జీ తెలుగు ఛానెల్లో నిర్వహించిన వరల్డ్ టెలివిజన్ ప్రీమియర్లో ఈ చిత్రం కళ్లు చెదిరే 14.2 టీఆర్పీ రేటింగ్ను నమోదు చేసి ట్రేడ్ వర్గాలను సైతం విస్మయానికి గురిచేసింది.
హ్యాట్రిక్ విజయం థియేటర్, ఓటీటీ, టీవీ
ఈ ఏడాది సంక్రాంతి బరిలో నిలిచిన ఈ చిత్రం కేవలం థియేటర్లకే పరిమితం కాకుండా మూడు మాధ్యమాల్లోనూ తన సత్తా చాటి హ్యాట్రిక్ విజయాన్ని నమోదు చేసింది. ప్రపంచవ్యాప్తంగా రూ. 300 కోట్లకు పైగా గ్రాస్ వసూళ్లు సాధించి మెగాస్టార్ స్టామినాను నిరూపించింది. జీ5 వేదికగా విడుదలైన అతి తక్కువ కాలంలోనే అత్యధిక వ్యూస్తో టాప్ ట్రెండింగ్లో నిలిచింది.
బుల్లితెరపై
ఫిబ్రవరి 28న ప్రసారమైన ఈ చిత్రం 14.2 రేటింగ్తో టీవీ చరిత్రలో ఈ మధ్య కాలంలో అత్యధిక ఆదరణ పొందిన సినిమాల్లో ఒకటిగా నిలిచింది. సక్సెస్ఫుల్ డైరెక్టర్ అనిల్ రావిపూడి దర్శకత్వంలో వచ్చిన ఈ సినిమాలో చిరంజీవి తన వింటేజ్ లుక్, కామెడీ టైమింగ్తో ప్రేక్షకులను అలరించారు. ఫ్యామిలీ ఎమోషన్స్ను, కామెడీని సమపాళ్లలో మిక్స్ చేయడంతో ఈ చిత్రం అన్ని వర్గాల ప్రేక్షకులను ఆకట్టుకుంది. మెగాస్టార్ నుండి ఒక పక్కా కమర్షియల్ ఎంటర్టైనర్ కోసం వేచి చూస్తున్న అభిమానులకు ఈ సినిమా కనుల పండుగగా నిలిచింది.
దర్శకుడి స్పందన
బుల్లితెరపై లభించిన ఈ అద్భుతమైన స్పందన పట్ల దర్శకుడు అనిల్ రావిపూడి సోషల్ మీడియా వేదికగా ఆనందం వ్యక్తం చేశారు. థియేటర్లలోనే కాకుండా టీవీల్లో కూడా ఇంతటి ప్రేమను చూపిస్తున్న ప్రేక్షకులకు ఆయన ప్రత్యేక కృతజ్ఞతలు తెలిపారు. పెద్ద సినిమాలు విడుదలైన కొద్ది కాలానికే టీవీల్లో ప్రసారమవుతున్నా, 14.2 టీఆర్పీ సాధించడం మెగాస్టార్కున్న చెక్కుచెదరని క్రేజ్కు నిదర్శనమని సినీ విశ్లేషకులు అభిప్రాయపడుతున్నారు.
