OG Release: తెలుగు సినీ పరిశ్రమలో ఒక అరుదైన, ఆరోగ్యకరమైన పరిణామం చోటుచేసుకుంది. భారీ వసూళ్లతో విజయవంతంగా ప్రదర్శితమవుతున్న తేజ సజ్జ చిత్రం మిరాయ్ టీమ్, పవన్ కల్యాణ్ నటించిన ఓజీ సినిమా కోసం స్వచ్ఛందంగా తమ థియేటర్లను అప్పగించాలని నిర్ణయించుకుంది. గురువారం ఓజీ విడుదల కానున్న నేపథ్యంలో ఆ సినిమాకు భారీ స్థాయిలో విడుదల లభించాలనే ఉద్దేశంతో మిరాయ్ చిత్ర బృందం ఈ నిర్ణయం తీసుకుంది.
గురువారం ఒక్క రోజు మాత్రమే
‘మిరాయ్’ సినిమా బాక్సాఫీస్ వద్ద ఇప్పటికే రూ. 150 కోట్లకు పైగా వసూళ్లు సాధించి, బ్లాక్‌బస్టర్‌గా నిలిచింది. అయినప్పటికీ గురువారం ఒక్క రోజు మాత్రం‘మిరాయ్’ ప్రదర్శితమవుతున్న అన్ని థియేటర్లను ‘ఓజీ’ కోసం కేటాయించనున్నట్లు చిత్ర బృందం ప్రకటించింది. ఈ నిర్ణయం పట్ల సినీ వర్గాల నుంచి సర్వత్రా ప్రశంసలు వ్యక్తమవుతున్నాయి. ఒక పెద్ద సినిమా కోసం మరో పెద్ద సినిమా ఈ విధంగా సహకరించడం ఆరోగ్యకరమైన వాతావరణాన్ని ప్రోత్సహిస్తుందని పలువురు అభిప్రాయపడుతున్నారు.
శుక్రవారం నుంచి యథావిధిగా ప్రదర్శనలు
‘మిరాయ్’ చిత్ర బృందం ప్రకటన ప్రకారం.. శుక్రవారం నుంచి అన్ని థియేటర్లలో ‘మిరాయ్’ ప్రదర్శనలు యథావిధిగా కొనసాగుతాయి. పవన్ కల్యాణ్ అభిమానులకు, ‘ఓజీ’కి శుభాకాంక్షలు చెబుతూ, ఈ నిర్ణయం పరిశ్రమలో మంచి సంప్రదాయాలకు నాంది పలుకుతుందని వారు ఆశాభావం వ్యక్తం చేశారు.
