Miss Universe India Ria Singha: టాలీవుడ్ ఎంట్రీ ఇస్తున్న మిస్ యూనివర్స్ ఇండియా రియా సింఘా

Miss Universe India Ria Singha: అందాల పోటీల్లో సత్తా చాటిన మరో యువ సుందరి వెండితెరపైకి అడుగుపెడుతున్నారు. మిస్ యూనివర్స్ ఇండియా-2024 విజేత రియా సింఘా తెలుగు సినిమాతోనే నటిగా తన ప్రయాణాన్ని ప్రారంభించడం విశేషం. కమెడియన్ సత్య హీరోగా మత్తు వదలరా ఫేమ్ రితేశ్ రాణా దర్శకత్వంలో తెరకెక్కుతున్న జెట్లీ చిత్రంలో రియా సింఘా హీరోయిన్‌గా నటిస్తున్నారు. బుధవారం ఆమె పుట్టినరోజు సందర్భంగా చిత్ర బృందం రియా సింఘా ఫస్ట్ లుక్‌ను విడుదల చేసింది. పోస్టర్‌లో రియా సింఘా ఇంటెన్స్ లుక్‌తో, యాక్షన్‌కు సిద్ధంగా ఉన్నట్లు కనిపించింది. ఈ చిత్రంలో ఆమె శివానీ రాయ్ అనే పాత్రను పోషిస్తున్నట్లు మేకర్స్ తెలిపారు. ఆమె పాత్రకు సినిమాలో యాక్షన్‌కు మంచి ప్రాధాన్యత ఉన్నట్లు తెలుస్తోంది.

రియా సింఘా నేపథ్యం:

గుజరాత్‌కు చెందిన రియా సింఘా కేవలం 18 ఏళ్ల వయసులోనే మిస్ యూనివర్స్ ఇండియా-2024 కిరీటాన్ని గెలుచుకుని అందరి దృష్టిని ఆకర్షించారు. అంతకుముందు ఆమె మిస్ టీన్ గుజరాత్, మిస్ టీన్ ఎర్త్ టైటిల్స్‌ను కూడా సొంతం చేసుకున్నారు. మిస్ టీన్ గుజరాత్ గెలిచిన తొలి గుజరాతీ అమ్మాయిగా ఆమె గుర్తింపు పొందారు. ఇటీవల జరిగిన మిస్ యూనివర్స్-2024 పోటీల్లో టాప్ 30లో నిలిచారు. చదువులో చురుగ్గా ఉంటూనే పెర్ఫామింగ్‌ ఆర్ట్స్‌లో డిగ్రీ పూర్తి చేసిన రియా, టెడెక్స్ స్పీకర్‌గా కూడా గుర్తింపు పొందారు.