Monalisa Exclusive Interview: లవ్ టు హేట్ యూ నటి ఎమోషనల్ జర్నీ

ప్రముఖ భోజ్‌పురి నటి, రియాలిటీ షోల ద్వారా విశేష ఆదరణ పొందిన మోనాలిసా (Monalisa Exclusive Interview) తాజాగా ఓ ప్రత్యేక ఇంటర్వ్యూలో పంచుకున్న విశేషాలు ఇక్కడ మీకోసం. తన తదుపరి వెబ్ సిరీస్ 'లవ్ టు హేట్ యూ' విశేషాలతో పాటు, కుటుంబ బాధ్యతలు, తల్లి కావాలనే తన కల, సినీ ప్రయాణం గురించి ఆమె ఎన్నో ఆసక్తికరమైన విషయాలు పంచుకున్నారు.

'లవ్ టు హేట్ యూ' వెబ్ సిరీస్ గురించి

మోనాలిసా నటిస్తున్న కొత్త వెబ్ సిరీస్ 'లవ్ టు హేట్ యూ'. ఈ సిరీస్ వర్టికల్, హారిజాంటల్ ఫార్మాట్‌లలో విడుదలవుతోంది. ఇందులో తన పాత్ర చాలా బోల్డ్, కాన్ఫిడెంట్, క్లాసీ, అత్యంత స్మార్ట్‌గా ఉంటుందని ఆమె తెలిపారు. తనకు కావాల్సింది ఏంటో స్పష్టంగా తెలుసుకునే ఆ పాత్ర, లక్ష్య సాధన కోసం ఎవరినైనా మానిప్యులేట్ చేయడానికి వెనుకాడదు. తన దారికి ఎవరైనా అడ్డొస్తే గట్టిగా సమాధానం చెప్పే శక్తి ఆ పాత్రకు ఉందని మోనాలిసా(Monalisa Exclusive Interview) వివరించారు.

భోజ్‌పురి సినిమా నుంచి వెబ్ సిరీస్‌ల వరకు..

భోజ్‌పురి చిత్ర పరిశ్రమ నుంచి టెలివిజన్, రియాలిటీ షోలు, ఇప్పుడు వెబ్ సిరీస్‌ల వరకు సాగిన తన సుదీర్ఘ ప్రయాణంపై మోనాలిసా ఎంతో కృతజ్ఞతాభావం వ్యక్తం చేశారు. ప్రతి వేదిక తనకు ఎంతో ప్రేమను, గుర్తింపును తెచ్చిపెట్టిందని ఆమె తెలిపారు. భోజ్‌పురి చిత్రాలు తనకు మొదటి బ్రేక్‌ను ఇస్తే, టెలివిజన్ తన పరిధిని విస్తరించిందని, రియాలిటీ షోలు వేరే రకమైన ప్రేక్షకులకు పరిచయం చేశాయని అన్నారు. ఇక ఇప్పుడు వెబ్ సిరీస్ ద్వారా సరికొత్త పాత్రలను అన్వేషించే అవకాశం దక్కిందని సంతోషం వ్యక్తం చేశారు.

వివాదాలకు దూరంగా ఉండటానికి కారణం?

ఇండస్ట్రీలో ఉన్నప్పటికీ అనవసరమైన వివాదాలకు దూరంగా ఉండటంపై స్పందిస్తూ.. తాను కేవలం పని చేయడానికి, తన ప్రతిభ ద్వారా ఎదగడానికి మాత్రమే ఇండస్ట్రీకి వచ్చానని స్పష్టం చేశారు. 2008లో 'దుల్హా అబేలా' షూటింగ్ సమయంలో విక్రాంత్‌ను కలిశానని, అక్కడే తమ ప్రేమకథ ప్రారంభమైందని చెప్పారు. తాము ఎప్పుడూ ఒకరికొకరం అంకితమై ఉన్నామని, అందుకే అనవసరమైన గాసిప్‌ల కంటే తన పనిపై, బంధంపైనే పూర్తి దృష్టి పెట్టానని తెలిపారు. నేటి సోషల్ మీడియా కాలంలో వివాదాల కంటే ప్రామాణికత చాలా కాలం నిలబడుతుందని ఆమె నమ్ముతున్నట్లు చెప్పారు

తల్లిదండ్రుల సంరక్షణ

కెరీర్‌తో పాటు కుటుంబాన్ని బ్యాలెన్స్ చేయడం సవాల్‌తో కూడుకున్నదని మోనాలిసా తెలిపారు. షూటింగ్‌లో బిజీగా ఉన్నప్పుడు తల్లి ఆరోగ్యం బాలేదని ఫోన్ వస్తే మనసు ఆందోళన చెందుతుందని అన్నారు. భర్త విక్రాంత్ తనకు అన్ని విషయాల్లోనూ మద్దతుగా నిలుస్తారని చెప్పారు.

ఆరోగ్య సమస్యలతో..

కుటుంబం తనకు సర్వస్వమని చెబుతూ.. ఏడాది క్రితం తండ్రిని కోల్పోయానని, ఆయనను ఇప్పటికీ మిస్ అవుతున్నానని భావోద్వేగానికి గురయ్యారు. తల్లి తీవ్రమైన ఆరోగ్య సమస్యలతో బాధపడుతున్నారని, ఆమెకు ఎల్లప్పుడూ మెరుగైన వైద్యం అందిస్తున్నామని తెలిపారు. తల్లిదండ్రులు లేని జీవితాన్ని ఊహించలేమని, వారి ఉనికియే తమకు అతిపెద్ద బలమని పేర్కొన్నారు. తల్లిదండ్రులను వృద్ధాశ్రమాలలో చేర్చే వారి గురించి మాట్లాడుతూ.. ప్రతి కుటుంబానికి కొన్ని ప్రత్యేక పరిస్థితులుంటాయని, అయితే ఎక్కడ ఉన్నా తల్లిదండ్రులను నిర్లక్ష్యం చేయకూడదని, వారికి ప్రేమ, గౌరవం ఇవ్వాలని సూచించారు.

మాతృత్వంపై భావోద్వేగ ప్రకటన

తన కుటుంబ నియంత్రణ, మాతృత్వం గురించి చాలామంది ఎలాంటి వాస్తవాలు తెలియకుండానే కామెంట్లు చేస్తుంటారని మోనాలిసా ఆవేదన వ్యక్తం చేశారు. తాము ఎన్నిసార్లు IVF ప్రయత్నాలు చేశాము, ఎన్ని ఇంజెక్షన్లు తీసుకున్నాము, ఎంత హార్మోన్ల అసమతుల్యతను ఎదుర్కొన్నామో బయటి వారికి తెలియదని స్పష్టం చేశారు. తాను ఎవరి దయ కోసం ఇవి చెప్పడం లేదని, ప్రతి ఒక్కరూ తమ జీవితంలో ఏదో ఒక పోరాటం చేస్తున్నారని.. అందరూ గ్రహించాలని కోరారు. సరైన సమయంలో అన్నీ జరుగుతాయనే గట్టి నమ్మకం తనకు ఉందని తెలిపారు.

నెగెటివ్ పాత్రలు, భవిష్యత్ ప్రాజెక్ట్‌లు

గ్రే, నెగెటివ్ పాత్రలు చేయడం తనకు చాలా ఇష్టమని మోనాలిసా చెప్పారు. అలాంటి పాత్రలకు లోతు ఉంటుందని, తెరపై విలన్‌గా కనిపించినంత మాత్రాన నిజ జీవితంలో తాను అలాగే ఉంటానని అనుకోకూడదన్నారు. అదే నటనలోని అసలైన అందం అని అన్నారు. భవిష్యత్తులో మంచి భోజ్‌పురి సినిమా వస్తే కచ్చితంగా చేస్తానని, ప్రస్తుతం టెలివిజన్, వర్టికల్ వెబ్ షోలపై దృష్టి పెట్టానని తెలిపారు. చివరగా, తనను ఇంతగా ఆదరిస్తున్న అభిమానులకు ఆమె హృదయపూర్వక కృతజ్ఞతలు తెలిపారు. తనపై ఎప్పుడూ ద్వేషం లేదని, అందరి ప్రేమను తిరిగి పంచడమే తనకు తెలుసని ముగించారు.