Mrunal Thakur: డీప్ఫేక్ చిత్రాలపై మృణాళ్ ఠాకూర్ ఆగ్రహం
మృణాళ్ ఠాకూర్ ఆగ్రహం
Mrunal Thakur: ప్రముఖ కథానాయిక మృణాళ్ ఠాకూర్ ఈసారి సినిమాలకు సంబంధం లేని ఒక తీవ్రమైన అంశంతో వార్తల్లో నిలిచారు. ఇటీవల సోషల్ మీడియాలో తన రూపంతో సృష్టించిన ఏఐ ఆధారిత డీప్ఫేక్ మరియు మార్ఫింగ్ చిత్రాలు ప్రత్యక్షం కావడంపై ఆమె అత్యంత ఘాటుగా స్పందించారు.
ట్విట్టర్ (ఎక్స్) వేదికగా ఉన్న ఒక ఎంటర్టైన్మెంట్ పేజీ మృణాళ్కు సంబంధించిన కొన్ని మార్ఫింగ్ ఫోటోలను అనుచిత రీతిలో షేర్ చేయడంతో ఈ వివాదం మొదలైంది. ఈ పోస్ట్పై తక్షణమే స్పందించిన నటి, ఆ ఫోటోలు అనుమతి లేకుండా, చట్టవిరుద్ధంగా తయారు చేసినవని మండిపడ్డారు. వాటిని వెంటనే సోషల్ మీడియా నుండి తొలగించాలని డిమాండ్ చేశారు. ఒకవేళ ఈ డీప్ఫేక్ చిత్రాలను ఇలాగే సర్క్యులేట్ చేస్తే తీవ్రమైన చట్టపరమైన చర్యలు తీసుకోవడమే కాకుండా అధికారికంగా ఫిర్యాదులు చేస్తానని గట్టిగా హెచ్చరించారు.
ఈ విషయమై ఆమె ఎక్స్ వేదికగా స్పందిస్తూ, "నా రూపాన్ని ఉపయోగిస్తూ డీప్ఫేక్ కంటెంట్ను సృష్టించడం లేదా ఇతరులతో పంచుకోవడం పూర్తిగా చట్టవిరుద్ధం మరియు ఎంతమాత్రం సహించరానిది. ఈ విషయాన్ని వెంటనే ఇక్కడితో నిలిపివేయడానికి ఇది నా అధికారిక హెచ్చరికగా భావించండి. నా గుర్తింపును దుర్వినియోగం చేస్తూ ఇంకా ఏమైనా చర్యలకు పాల్పడితే ఖచ్చితంగా తీవ్రమైన చట్టపరమైన పరిణామాలు ఎదుర్కోవాల్సి వస్తుంది" అని తెగేసి చెప్పారు.
ఇలా ఏఐ సాంకేతికతతో సృష్టించిన మార్ఫింగ్ కంటెంట్ వల్ల ఆన్లైన్లో ఇబ్బందులు ఎదుర్కొన్నది కేవలం మృణాళ్ ఠాకూర్ మాత్రమే కాదు, గతంలో కూడా పలువురు ప్రముఖ కథానాయికలు సైతం ఈ రకమైన డీప్ఫేక్ చిత్రాల బారిన పడ్డారు. ఇక వృత్తిపరమైన విషయానికి వస్తే, మృణాళ్ ఇప్పటివరకు తన తదుపరి చిత్రాన్ని అధికారికంగా ప్రకటించనప్పటికీ, అల్లు అర్జున్ సరసన 'రాకా' అనే చిత్రంలో నటిస్తున్నట్లు నెట్టింట వార్తలు వస్తున్నాయి.
