Nani’s ‘The Paradise’: బాక్సాఫీస్ వద్ద నాని ఊచకోత.. ది ప్యారడైజ్ తొలిరోజు కలెక్షన్లు ఎంతంటే..?

Nani’s ‘The Paradise’: నేచురల్ స్టార్ నాని, దర్శకుడు శ్రీకాంత్ ఓదెల కాంబినేషన్‌లో వచ్చిన తాజా చిత్రం ది ప్యారడైజ్ బాక్సాఫీస్ వద్ద సరికొత్త చరిత్ర సృష్టించింది. భారీ అంచనాల నడుమ విడుదలైన ఈ యాక్షన్ డ్రామా నాని కెరీర్‌లోనే బిగ్గెస్ట్ ఓపెనింగ్ సాధించిన చిత్రంగా నిలిచింది. ప్రముఖ ట్రేడ్ పోర్టల్ ‘సాక్‌నిల్క్’ నివేదికల ప్రకారం ఈ చిత్రం మొదటి రోజే ప్రపంచవ్యాప్తంగా ఏకంగా రూ.76.90 కోట్ల గ్రాస్ వసూళ్లను రాబట్టి ట్రేడ్ వర్గాలను సైతం ఆశ్చర్యపరిచింది.

దేశవ్యాప్తంగా 9,732 షోలతో ప్రదర్శితమైన ఈ సినిమా తొలిరోజే భారత్‌లో రూ.34.65 కోట్ల నెట్ వసూళ్లను సాధించింది. ప్రివ్యూ షోలతో కలిపి దేశీయ గ్రాస్ కలెక్షన్లు రూ.54.90 కోట్లకు చేరాయి. మరోవైపు విదేశాల్లోనూ నాని మార్కెట్ స్టామినాను నిరూపిస్తూ ఓవర్సీస్‌లో రూ.22 కోట్ల గ్రాస్ నమోదు కావడంతో, మొత్తం వరల్డ్‌వైడ్ గ్రాస్ రూ.76.90 కోట్ల మైలురాయిని సునాయాసంగా అధిగమించింది.

ఈ భారీ వసూళ్లతో నాని తన గత చిత్రాల రికార్డులను తిరగరాశారు. ఇంతకుముందు 2025లో విడుదలైన హిట్: ది థర్డ్ కేస్ మొదటి రోజున భారత్‌లో రూ.21 కోట్ల నెట్, ప్రపంచవ్యాప్తంగా రూ.37.81 కోట్ల గ్రాస్‌తో అత్యధిక ఓపెనింగ్ చిత్రంగా నిలిచింది. ఇప్పుడు ది ప్యారడైజ్ ఆ రికార్డును రెట్టింపు స్థాయిలో బద్దలు కొట్టింది. గతంలో వచ్చిన ‘దసరా’ రూ.23.20 కోట్ల నెట్ (రూ.36.28 కోట్ల గ్రాస్), ‘సరిపోదా శనివారం’ రూ.9 కోట్ల నెట్ (రూ.19.34 కోట్ల గ్రాస్) సాధించగా, వాటన్నింటినీ ఈ సినిమా భారీ మార్జిన్‌తో వెనక్కి నెట్టింది.

ఇటీవల కాలంలో విడుదలైన టాలీవుడ్ స్టార్ హీరోల చిత్రాలతో పోల్చినా ది ప్యారడైజ్ అద్భుతమైన ప్రారంభాన్ని అందుకుంది. రామ్‌చరణ్ ‘పెద్ది’ తొలిరోజు రూ.110.49 కోట్ల గ్రాస్ (రూ.51 కోట్ల నెట్), ప్రభాస్ ‘ది రాజా సాబ్’ రూ.100.20 కోట్ల గ్రాస్ (రూ.53.75 కోట్ల నెట్) రాబట్టగా, చిరంజీవి ‘మన శంకర వర ప్రసాద్ గారు’ సాధించిన రూ.37.1 కోట్ల గ్రాస్ వసూళ్లను నాని సులువుగా దాటేశారు. మొదటి రోజే సృష్టించిన ఈ ఊపుతో వీకెండ్ ముగిసే సమయానికి ఈ చిత్రం మరింత భారీ కలెక్షన్ల రికార్డులను నెలకొల్పడం ఖాయంగా కనిపిస్తోంది.