Nara Rohith’s Wedding: టాలీవుడ్‌లో తన విలక్షణ నటనతో గుర్తింపు తెచ్చుకున్న హీరో నారా రోహిత్ త్వరలోనే వైవాహిక జీవితంలోకి అడుగుపెట్టనున్నారు. ఆయన తన ప్రేయసి శిరీషను వివాహం చేసుకోబోతున్నారు. ఇరు కుటుంబాలు సంప్రదించి వీరి పెళ్లి ముహూర్తాన్ని తాజాగా నిర్ణయించారు. నారా రోహిత్, శిరీషల వివాహం అక్టోబర్ 30న రాత్రి 10:35 గంటలకు హైదరాబాద్‌లో అంగరంగ వైభవంగా జరగనుంది. ఈ శుభకార్యానికి సినీ, రాజకీయ రంగాలకు చెందిన పలువురు ప్రముఖులు హాజరై నూతన వధూవరులను ఆశీర్వదించనున్నారు.
నాలుగు రోజుల పాటు వైభవంగా వేడుకలు
పెళ్లి వేడుకలు మొత్తం నాలుగు రోజుల పాటు అత్యంత వైభవంగా జరగనున్నాయని సమాచారం. పెళ్లి సందడి అక్టోబర్ 25న హల్దీ వేడుకతో ప్రారంభం కానుంది. అనంతరం అక్టోబర్ 26న సంప్రదాయబద్ధంగా పెళ్లికొడుకు కార్యక్రమాన్ని నిర్వహించనున్నారు. అత్యంత సన్నిహితులు, కుటుంబ సభ్యుల మధ్య అక్టోబర్ 28న మెహందీ వేడుకను ఎంతో సందడిగా నిర్వహించడానికి ఏర్పాట్లు చేస్తున్నారు. సుదీర్ఘ విరామం తర్వాత సినిమాలతో మళ్లీ బిజీ అవుతున్న నారా రోహిత్, మరోవైపు వ్యక్తిగత జీవితంలో కొత్త అధ్యాయాన్ని ప్రారంభించనుండటంతో ఆయన అభిమానులు, సినీ ప్రేక్షకులు సంతోషం వ్యక్తం చేస్తున్నారు.
