‘Ellamma’ Project: బలగం వంటి బ్లాక్‌బస్టర్ హిట్‌తో దర్శకుడిగా తనకంటూ ప్రత్యేక స్థానాన్ని సంపాదించుకున్న వేణు యెల్దండి తన తదుపరి చిత్రం 'ఎల్లమ్మ' విషయంలో వరుసగా ఎదురుదెబ్బలు తగులుతున్నాయి. తాజాగా, ఈ ప్రతిష్టాత్మక ప్రాజెక్టు నుంచి యంగ్ హీరో నితిన్ తప్పుకున్నట్లు టాలీవుడ్‌లో బలంగా ప్రచారం జరుగుతోంది. నిర్మాత దిల్ రాజుతో కలిసి వేణు ఈ సినిమాను తెరకెక్కించనున్నారు. నిజానికి, 'ఎల్లమ్మ' కథ మొదట నేచురల్ స్టార్ నాని వద్దకు వెళ్లింది. కథ నచ్చినా, సెకండ్ హాఫ్ విషయంలో సంతృప్తి చెందకపోవడంతో నాని ఈ ప్రాజెక్ట్‌ను వదులుకున్నారని సమాచారం. ఆ తర్వాత నిర్మాత దిల్ రాజు ఈ కథను హీరో నితిన్ వద్దకు తీసుకెళ్లారు. నితిన్ కూడా ఈ కథకు గ్రీన్ సిగ్నల్ ఇచ్చి, 'తమ్ముడు' సినిమా విడుదలైన తర్వాత షూటింగ్ ప్రారంభిస్తామని దిల్ రాజు స్వయంగా ప్రకటించారు.
నితిన్ నటించిన 'తమ్ముడు' సినిమా బాక్సాఫీస్ వద్ద ఆశించిన విజయాన్ని అందుకోలేకపోయింది. ఈ పరాజయం నేపథ్యంలో, నితిన్ మరియు దిల్ రాజు పరస్పర అంగీకారంతో 'ఎల్లమ్మ' ప్రాజెక్ట్ నుంచి నితిన్ వైదొలిగినట్లు సినీ వర్గాల టాక్. నితిన్ ఈ నిర్ణయం తీసుకోవడానికి రెండు ప్రధాన కారణాలు వినిపిస్తున్నాయి 'తమ్ముడు' ఫ్లాప్ ప్రభావంతో దిల్ రాజు, భారీ బడ్జెట్‌తో మరో సినిమా చేసేందుకు కొంత వెనకడుగు వేయడం. గ్రామీణ నేపథ్యం, భావోద్వేగాలు ఎక్కువగా ఉండే 'ఎల్లమ్మ' కథ తన యాక్షన్ ఇమేజ్‌కు సరిపోకపోవచ్చని నితిన్ భావించడం.
నితిన్ తప్పుకోవడంతో, దిల్ రాజు, వేణు వెంటనే మరో హీరో వేటలో పడ్డారు. మొదట్లో శర్వానంద్ పేరు వినిపించినప్పటికీ, తాజాగా బెల్లంకొండ సాయి శ్రీనివాస్ ఈ ప్రాజెక్ట్‌లో హీరోగా నటించనున్నట్లు వార్తలు వినిపిస్తున్నాయి. ఇటీవల 'కిష్కింధపురి' సినిమాతో సాయి శ్రీనివాస్ మంచి విజయం సాధించిన నేపథ్యంలో, వేణు ఆయనకు 'ఎల్లమ్మ' కథను వినిపించారు. సాయి శ్రీనివాస్ కూడా ఈ భావోద్వేగ కథకు, పర్ఫార్మెన్స్ స్కోప్ ఉన్న పాత్రకు ఆకర్షితుడై గ్రీన్ సిగ్నల్ ఇచ్చారని సమాచారం. ఇదివరకు యాక్షన్ సినిమాలతో ప్రేక్షకులను అలరించిన సాయి శ్రీనివాస్, 'ఎల్లమ్మ' ద్వారా తనలోని మరో కోణాన్ని చూపించడానికి ఆసక్తి చూపుతున్నట్లు తెలుస్తోంది. వేణు 'ఎల్లమ్మ' ప్రాజెక్ట్ హీరో విషయంలో కొనసాగుతున్న సస్పెన్స్‌కు తెరపడాలంటే, శ్రీ వెంకటేశ్వర క్రియేషన్స్ బ్యానర్‌లో త్వరలోనే అధికారిక ప్రకటన వెలువడాల్సి ఉంది. ఈసారి హీరో లాక్ అయి, సినిమా సెట్స్ మీదకు వెళ్తుందో లేదో వేచి చూడాలి.
