Prabhas-Hanu Movie: పాన్ ఇండియా స్టార్ ప్రభాస్, 'సీతారామం' దర్శకుడు హను రాఘవపూడి కాంబినేషన్‌లో వస్తున్న భారీ బడ్జెట్ సినిమా లీకుల బారిన పడింది. సినిమా షూటింగ్ సెట్స్ నుంచి ఓ ఫొటో బయటకు రావడంతో, దీనిపై నిర్మాణ సంస్థ మైత్రీ మూవీ మేకర్స్ తీవ్రంగా స్పందించింది. లీకైన ఫొటోను షేర్ చేసిన వారిపై కఠిన చర్యలు తీసుకుంటామని, దీనిని సైబర్ క్రైమ్‌గా పరిగణించి కేసులు నమోదు చేస్తామని హెచ్చరించింది.
మైత్రీ మూవీ మేకర్స్ అధికారిక ప్రకటన
ఈ లీక్‌పై స్పందిస్తూ మైత్రీ మూవీ మేకర్స్ తమ అధికారిక ఎక్స్ (ట్విట్టర్) ఖాతాలో ఒక ప్రకటన విడుదల చేసింది. ప్రభాస్ - హను సెట్స్ నుంచి లీకైన చిత్రాన్ని చాలామంది షేర్ చేస్తున్నట్లు మా దృష్టికి వచ్చింది. ప్రేక్షకులకు ఒక గొప్ప అనుభూతిని అందించడానికి మేము కష్టపడుతుంటే, ఇలాంటి లీకులు మా బృందం యొక్క నైతిక స్థైర్యాన్ని దెబ్బతీస్తాయి. ఈ ఫొటోను ఇకపై ఎవరైనా షేర్ చేస్తే, వారి సోషల్ మీడియా ఖాతాలను రిపోర్ట్ చేసి మూసివేయించడమే కాకుండా, ఇది ఒక సైబర్ నేరంగా పరిగణించి చట్టపరమైన చర్యలు తీసుకుంటాం” అని సంస్థ స్పష్టం చేసింది.
1940ల కాలం నాటి చారిత్రక నేపథ్యంలో ఈ చిత్రం రూపొందుతోంది. ప్రస్తుతం ఈ సినిమాకు 'ప్రభాస్ హను' అనే వర్కింగ్ టైటిల్ ప్రచారంలో ఉంది. ఈ చిత్రంలో ప్రభాస్ సరసన నటి ఇమాన్వి కనిపించనుండగా, బాలీవుడ్ ప్రముఖ నటులు మిథున్ చక్రవర్తి, జయప్రద కీలక పాత్రల్లో నటిస్తున్నారు. ప్రస్తుతం సినిమా షూటింగ్ శరవేగంగా జరుగుతోంది.
హను రాఘవపూడి తన ఆస్థాన సంగీత దర్శకుడైన విశాల్ చంద్రశేఖర్కు ఈ చిత్రానికి కూడా బాధ్యతలు అప్పగించారు. గతంలో వీరిద్దరి కలయికలో వచ్చిన 'సీతారామం' ఎంతటి ఘన విజయం సాధించిందో తెలిసిందే. ఈ చిత్రానికి సుదీప్ ఛటర్జీ సినిమాటోగ్రఫీ, కృష్ణకాంత్ సాహిత్యం అందిస్తున్నారు. భారీ అంచనాల మధ్య రూపొందుతున్న ఈ సినిమాపై జరిగిన లీకుల వ్యవహారం ఇప్పుడు సినీ వర్గాల్లో చర్చనీయాంశంగా మారింది.
