Priyamani: టాలీవుడ్లో తనకంటూ ఒక ప్రత్యేక గుర్తింపు తెచ్చుకుని, ఆపై బాలీవుడ్ మరియు ఓటీటీ వెబ్ సిరీస్ల ద్వారా దేశవ్యాప్తంగా అభిమానులను సంపాదించుకున్న నటి ప్రియమణి.. ఇప్పుడు అంతర్జాతీయ స్థాయిలో మెరవబోతున్నారు. ఒక ప్రతిష్టాత్మక ఇండో-అమెరికన్ హాలీవుడ్ చిత్రంలో ఆమె ప్రధాన పాత్ర పోషిస్తున్నట్లు అధికారిక ప్రకటన వెలువడింది.
ఇమ్మిగ్రెంట్ కథాంశంతో క్రాస్-బోర్డర్ డ్రామా
ఈ చిత్రంలో ప్రియమణి సరసన బాలీవుడ్ నటుడు, ఉరి ఫేమ్ మోహిత్ రైనా నటిస్తున్నారు. ఈ సినిమా కథాంశం చాలా ఆసక్తికరంగా ఉండబోతోంది. అమెరికాలో స్థిరపడాలనుకునే ఒక భారతీయ వలస కుటుంబం ఎదుర్కొనే భావోద్వేగపూరితమైన సవాళ్లు, వారి మూలాలు మరియు గుర్తింపు కోసం చేసే పోరాటం చుట్టూ ఈ కథ తిరుగుతుంది.
ఇది ఒక యదార్థ సంఘటన ఆధారంగా తెరకెక్కుతున్నట్లు సమాచారం.
ఈ ఇండో-హాలీవుడ్ వెంచర్ను అమెరికాకు చెందిన రెడ్ బైసన్ ప్రొడక్షన్స్, ముంబైలోని అజూర్ ఎంటర్టైన్మెంట్ సంయుక్తంగా నిర్మిస్తున్నాయి. హర్ష్ మహదేశ్వర్ ఈ చిత్రానికి దర్శకత్వం వహించనున్నారు. ఈ సినిమా షూటింగ్ ఏప్రిల్ 2026లో ప్రారంభం కానుంది. అమెరికాలోని న్యూయార్క్, న్యూజెర్సీలతో పాటు భారతదేశంలోని ఢిల్లీ జమ్మూ-కాశ్మీర్లోని అందమైన ప్రదేశాలలో చిత్రీకరణ జరపనున్నారు.
ప్రియమణి స్పందన
ఈ ప్రాజెక్ట్ గురించి ప్రియమణి స్పందిస్తూ.. "ఈ కథలోని నిజాయితీ నన్ను ఎంతగానో ఆకట్టుకుంది. సరిహద్దులతో సంబంధం లేకుండా ప్రతి ఒక్కరికీ కనెక్ట్ అయ్యే ఎమోషనల్ జర్నీ ఇది" అని ఆనందం వ్యక్తం చేశారు. మోహిత్ రైనా కూడా ఇది తన కెరీర్లో ఒక మైలురాయి లాంటి చిత్రమని పేర్కొన్నారు.
