Priyamani’s Photo Added to Ramanaidu Studios: రామానాయుడు స్టూడియోస్ వాల్ ఆఫ్ ఫేమ్ పై ప్రియమణి ఫొటో.. దశాబ్దాల నాటి కల నెరవేరిన వేళ..

Priyamani’s Photo Added to Ramanaidu Studios: టాలీవుడ్ నుంచి బాలీవుడ్ వరకు విభిన్నమైన పాత్రలతో దేశవ్యాప్తంగా నటిగా తనకంటూ ఒక ప్రత్యేక ముద్ర వేసుకున్నారు నేషనల్ అవార్డ్ విన్నర్, సీనియర్ నటి ప్రియమణి. విక్టరీ వెంకటేష్ సరసన ఆమె నటించిన నారప్ప చిత్రం నేరుగా ఓటీటీలో విడుదలై ఎంతటి ఘనవిజయం సాధించిందో అందరికీ తెలిసిందే. శ్రీకాంత్ అడ్డాల దర్శకత్వంలో ప్రతిష్ఠాత్మక సురేష్ ప్రొడక్షన్స్ బ్యానర్‌పై డి. సురేష్ బాబు నిర్మించిన ఈ చిత్రంలో సుందరమ్మగా ప్రియమణి నటనకు ప్రేక్షకులు, విమర్శకుల నుంచి ప్రశంసలు దక్కాయి.

అయితే ఈ సినిమా తన కెరీర్‌లో ఎంత ప్రత్యేకమైనదో వివరిస్తూ తాజాగా ఒక ఇంటర్వ్యూలో ప్రియమణి తన మనసులోని ఒక భావోద్వేగమైన ముచ్చటను పంచుకున్నారు.

రామానాయుడు స్టూడియో గోడ.. ఆనాటి బలమైన కోరిక..

"చాలా ఏళ్ల క్రితం నేను రామానాయుడు స్టూడియోలో షూటింగ్ చేస్తున్న సమయంలో.. అక్కడ ఒక గోడపై ఎంతోమంది ప్రముఖ నటీమణుల ఫొటోలు అందంగా అలంకరించి ఉండటం చూశాను. అప్పట్లో వాటి ప్రాధాన్యత నాకు పూర్తిగా తెలియదు. కానీ ఆ తర్వాత తెలిసింది.. వారంతా సురేష్ ప్రొడక్షన్స్ బ్యానర్‌లో నటించిన లెజెండరీ హీరోయిన్లు అని. ఆ రోజే నా మనసులో ఒక బలమైన కోరిక కలిగింది.. ఎలాగైనా భవిష్యత్తులో ఆ గోడపై నా ఫొటో కూడా స్థానం సంపాదించుకోవాలని అనుకున్నాను" అని ప్రియమణి చెప్పుకొచ్చారు.

నారప్పతో నెరవేరిన దశాబ్దాల కల..

ఆమె అనుకున్నట్లుగానే కొన్ని సంవత్సరాల తర్వాత సురేష్ ప్రొడక్షన్స్ బ్యానర్ నుండి నారప్ప రూపంలో ప్రియమణికి అద్భుతమైన అవకాశం వచ్చింది. టాలీవుడ్ ప్రతిష్ఠాత్మక బ్యానర్‌లో భాగమవ్వాలనే దశాబ్దాల కల ఈ చిత్రంతో నెరవేరింది. విక్టరీ వెంకటేష్ సరసన ఒక పవర్‌ఫుల్ పాత్రలో నటించే అవకాశం దక్కింది. నారప్ప ఘనవిజయంతో రామానాయుడు స్టూడియోలోని ఆ దిగ్గజ హీరోయిన్ల ఫొటోల పక్కన ఈరోజు ప్రియమణి ఫొటో కూడా చేరింది.

దర్శకుడి విజన్‌పై ప్రశంసలు

దర్శకుడు శ్రీకాంత్ అడ్డాల గురించి మాట్లాడుతూ.. ఆయన ఒక గొప్ప విజన్ ఉన్న దర్శకుడని, నారప్ప చిత్రాన్ని ఎంతో అద్భుతంగా, భావోద్వేగభరితంగా తెరకెక్కించారని ప్రియమణి కొనియాడారు. చిన్ననాటి కోరిక నెరవేరి, ఆ ప్రతిష్ఠాత్మక గోడపై తన ఫొటో స్థానం సంపాదించుకోవడం తనకు ఎంతో గర్వంగా, సంతోషంగా ఉందని ఆమె భావోద్వేగానికి లోనయ్యారు.