Priyanka Chopra: స్వర్ణ దేవాలయంలో ప్రియాంక చోప్రా సేవ.. గిన్నెలు కడుగుతూ భక్తి పారవశ్యం..

Priyanka Chopra: గ్లోబల్ స్టార్ ప్రియాంక చోప్రా చాలా కాలం తర్వాత భారత్‌లో సందడి చేస్తున్నారు. తాజాగా అమృత్‌సర్‌లోని ప్రఖ్యాత స్వర్ణ దేవాలయాన్ని సందర్శించిన ఆమె, అక్కడ ఒక సామాన్య భక్తురాలిలా ఆధ్యాత్మిక సేవలో పాల్గొని అందరినీ ఆశ్చర్యపరిచారు. దీనికి సంబంధించిన ఫోటోలు, వీడియోలు ప్రస్తుతం సోషల్ మీడియాలో వైరల్ అవుతున్నాయి.

మహావీర్ జయంతి వేళ ఆధ్యాత్మిక సేవ:

మహావీర్ జయంతిని పురస్కరించుకుని ప్రియాంక స్వర్ణ దేవాలయానికి చేరుకున్నారు. గులాబీ రంగు సాంప్రదాయ దుస్తులు ధరించి, తలపై దుపట్టా కప్పుకుని ఆమె ప్రత్యేక ప్రార్థనలు నిర్వహించారు. అనంతరం సిక్కు మతంలో ఎంతో పవిత్రంగా భావించే సేవలో భాగంగా భక్తులు భోజనం చేసిన గిన్నెలను ఆమె స్వయంగా శుభ్రం చేశారు. ఎటువంటి సెలబ్రిటీ హంగులు లేకుండా ఆమె చేసిన ఈ పనికి నెటిజన్ల నుండి ప్రశంసలు వెల్లువెత్తుతున్నాయి.

రాజమౌళి - మహేశ్ బాబు సినిమా కోసమేనా?

ప్రియాంక అకస్మాత్తుగా పంజాబ్ పర్యటనకు రావడం వెనుక బలమైన కారణం ఉందనే చర్చ నడుస్తోంది. దర్శకధీరుడు ఎస్.ఎస్. రాజమౌళి ప్రతిష్ఠాత్మకంగా తెరకెక్కిస్తున్న అంతర్జాతీయ స్థాయి చిత్రం వారణాసి షూటింగ్ కోసమే ఆమె భారత్‌కు వచ్చినట్లు సమాచారం. ఈ చిత్రంలో ప్రియాంక చోప్రా మందాకినిఅనే పవర్ ఫుల్ పాత్రలో నటిస్తున్నారు. చాలా కాలం తర్వాత ఆమె ఇండియన్ స్క్రీన్ పై కనిపిస్తుండటం విశేషం.

రిలీజ్ ఎప్పుడంటే?

ప్రస్తుతం పంజాబ్ పరిసర ప్రాంతాల్లో షూటింగ్ జరుపుకుంటున్న ఈ చిత్రాన్ని 2027 ఏప్రిల్ 7న ప్రపంచవ్యాప్తంగా భారీ ఎత్తున విడుదల చేసేందుకు నిర్మాతలు ప్లాన్ చేస్తున్నారు. రాజమౌళి విజన్, మహేశ్ బాబు క్రేజ్, ప్రియాంక చోప్రా గ్లోబల్ ఇమేజ్ తోడవ్వడంతో ఈ సినిమాపై అంచనాలు ఆకాశాన్ని తాకుతున్నాయి.