Raasi Makes Sensational Comments: నిజం సినిమాపై నటి రాశి సంచలన వ్యాఖ్యలు..

Raasi Makes Sensational Comments: తిరువీర్ హీరోగా నటించిన పాపం ప్రతాప్ చిత్రంలో హీరో తల్లిగా నటించిన రాశి, తన నటనతో మరోసారి ప్రేక్షకులను ఆకట్టుకున్నారు. ఈ చిత్ర విజయం పట్ల ఆనందం వ్యక్తం చేస్తూ, తన కెరీర్‌లోని మైలురాయి వంటి నిజం సినిమా గురించి అడిగిన ప్రశ్నకు ఆమె స్పందించారు.

ఆ పాత్ర ఒక ప్రయోగమే..

దర్శకుడు తేజ రూపొందించిన నిజం సినిమాలో రాశి చేసిన నెగెటివ్ షేడ్ ఉన్న పాత్ర అప్పట్లో పెద్ద సంచలనం సృష్టించింది. దీనిపై ఆమె స్పందిస్తూ.. "నిజం సినిమాలో నా పాత్ర అంత నెగెటివ్‌గా మారుతుందని నేను అస్సలు ఊహించలేదు. కేవలం ఒక నటిగా అన్ని రకాల పాత్రలను చేయాలనే ఉద్దేశంతోనే ఆ సినిమాలో నటించాను" అని వెల్లడించారు.

ఇకపై తాను చేసే పాత్రల విషయంలో చాలా క్లారిటీతో ఉంటానని, కేవలం పాజిటివ్ పాత్రలే కాకుండా కథలో దమ్మున్న ఏ పాత్రనైనా చేయడానికి సిద్ధమని స్పష్టం చేశారు.

నా కోసమే రాసిన పాత్ర

ప్రస్తుత సినిమా పాపం ప్రతాప్ గురించి చెబుతూ.. దర్శకుడు దుర్గా నరేష్ ఈ పాత్రను తన కోసమే ప్రత్యేకంగా రాశారని, ఆ నమ్మకమే తనను ఈ సినిమా వైపు నడిపించిందని రాశి తెలిపారు. "పాత్ర బాగుండి ప్రేక్షకులకు నచ్చుతుంది అనుకుంటేనే గ్రీన్ సిగ్నల్ ఇస్తాను. అది నెగెటివా లేదా పాజిటివా అన్నది నాకు ముఖ్యం కాదు" అని ఆమె వివరించారు.

చాలా కాలం తర్వాత రాశి ఒక పూర్తిస్థాయి పాత్రలో కనిపించడంతో ఆమె అభిమానులు ఖుషీ అవుతున్నారు. తిరువీర్, పాయల్ రాధాకృష్ణ ప్రధాన పాత్రల్లో నటించిన ఈ చిత్రంలో అజయ్ ఘోష్, రాశి కీలక పాత్రలు పోషించారు.