Kriti Sanon: రక్షాబంధన్ యాడ్ వివాదం..ఆడవాళ్లు ఏం ధరించాలో చెప్పడం ఎప్పుడు ఆపుతారు?: కృతి సనన్

Kriti Sanon: అన్నాచెల్లెళ్లు, అక్కాతమ్ముళ్ల పవిత్ర ప్రేమకు ప్రతీకగా నిలిచే రక్షాబంధన్ పండుగ వేళ.. బాలీవుడ్ స్టార్ హీరోయిన్ కృతి సనన్ నటించిన ఓ వాణిజ్య ప్రకటన సోషల్ మీడియాలో పెద్ద దుమారమే రేపింది. ఆ వివాదంపై తాజాగా కృతి సనన్ తీవ్రంగా స్పందించారు.

అసలేం జరిగింది? ఆమె ఎందుకు విమర్శలపాలయ్యారు?అసలు వివాదం ఏమిటి? అంటే ప్రముఖ జ్యువెలరీ బ్రాండ్ 'గివా' కోసం కృతి సనన్ ఇటీవల ఓ ప్రమోషనల్ యాడ్‌లో నటించారు. అయితే, ఈ యాడ్‌లో ఆమె ధరించిన వస్త్రధారణపై నెటిజన్లు తీవ్ర ఆగ్రహం వ్యక్తం చేశారు. సాంప్రదాయ పండుగ రోజు సోదరుడికి రాఖీ కట్టే సమయంలో ఆమె మోడర్న్, బోల్డ్ లుక్‌లో ఉన్న బ్రాలెట్ స్టైల్ బ్లౌజ్, స్కర్ట్ ధరించడంపై సోషల్ మీడియాలో పెద్ద ఎత్తున ట్రోలింగ్ జరిగింది.

అంతేకాకుండా, ఇదే యాడ్‌లో తన పెంపుడు శునకానికి కూడా రాఖీ కట్టేలా ఒక సన్నివేశాన్ని చూపించడంపై కొందరు అభ్యంతరం వ్యక్తం చేశారు. హిందూ సంప్రదాయాలను, పండుగ పవిత్రతను ఈ యాడ్ అపహాస్యం చేసేలా ఉందంటూ నెటిజన్లతో పాటు, బీజేపీ ఎంపీ, నటి కంగనా రనౌత్ సైతం కృతి తీరును బహిరంగంగా తప్పుబట్టారు.

నలువైపుల నుంచి వస్తున్న విమర్శలపై బాలీవుడ్ భామ కృతి సనన్ సోషల్ మీడియా వేదికగా ఎంతో ధీటుగా స్పందించారు. "అసలు మహిళలు ఎలాంటి దుస్తులు ధరించాలో చెప్పడం మనం ఎప్పుడు ఆపుతాం?" అని ఆమె ఎదురు ప్రశ్నించారు.

కాలంతో పాటు ఫ్యాషన్ మారుతున్నప్పటికీ.. ఒక మహిళ తన సంస్కృతి పట్ల చూపించే గౌరవాన్ని కేవలం ఆమె దుస్తులతోనే కొలవడం సరికాదని హితవు పలికారు. సంస్కృతి, సంప్రదాయాలు హృదయంలో ఉంటాయే కానీ, ధరించే బట్టల్లో కాదంటూ గట్టి కౌంటర్ ఇచ్చారు. ఇక పెంపుడు కుక్కకు రాఖీ కట్టడంపై వస్తున్న విమర్శలకూ కృతి స్పష్టతనిచ్చారు. రక్షాబంధన్ అంటే పరస్పర రక్షణకు, ప్రేమకు ప్రతీక అని.. తమ కుటుంబంలో పెంపుడు జంతువులు కూడా భాగమేనని, వాటి ఆరోగ్యం, సంతోషం కోసం ప్రార్థించడంలో తప్పులేదని ఆమె స్పష్టం చేశారు. మొత్తానికి, తనపై వస్తున్న ట్రోలింగ్‌కు కృతి సనన్ ఇచ్చిన ఈ స్ట్రాంగ్ రిప్లై ప్రస్తుతం సినీ వర్గాల్లో హాట్ టాపిక్‌గా మారింది