Rakul Preet Singh: రామాయణలో శూర్పణఖ పాత్రపై రకుల్‌ ప్రీత్‌ సింగ్ ఆసక్తికర వ్యాఖ్యలు..

Rakul Preet Singh: బాలీవుడ్ ప్రముఖ దర్శకుడు నితీశ్‌ తివారీ అత్యంత భారీ బడ్జెట్‌తో తెరకెక్కిస్తున్న పౌరాణిక చిత్రం రామాయణలో నటి రకుల్‌ ప్రీత్‌ సింగ్ కీలక పాత్రలో నటిస్తున్న సంగతి తెలిసిందే. ఈ సినిమాలో రామాయణ కథను మలుపు తిప్పే శూర్పణఖ పాత్రను రకుల్ పోషిస్తోంది. కాగా ఈ పాత్ర ఎంపికపై ఆమె తాజాగా స్పందిస్తూ పలు ఆసక్తికర విషయాలను పంచుకుంది. సమాజంలో సాధారణంగా శూర్పణఖ అనగానే లక్ష్మణుడు ముక్కు, చెవులు కోసిన ఒకే ఒక్క సంఘటన గుర్తుకొస్తుందని, కానీ ఆమె పాత్ర వెనుక అంతకుమించిన భావోద్వేగాలు, సంక్లిష్టత ఉన్నాయని రకుల్ పేర్కొంది. శూర్పణఖ కేవలం ఒక నెగెటివ్ క్యారెక్టర్ మాత్రమే కాదని, ముక్కోటి దేవతలను సైతం శాసించిన రామాయణ మహాకావ్యపు కథా గమనాన్ని పూర్తిగా మార్చేసిన అత్యంత బలమైన పాత్ర అని అభిప్రాయపడింది.

అభిమాని లేఖకు రకుల్ సమాధానం

ఇటీవల ఓ అభిమాని రకుల్‌కు బహిరంగ లేఖ రాస్తూ.. సాధారణంగా గ్లామర్ పాత్రలు చేసే రకుల్, శూర్పణఖ లాంటి భిన్నమైన పాత్రను ఎంచుకోవడానికి గల ప్రేరణ ఏంటని ప్రశ్నించారు. దీనికి రకుల్ సోషల్ మీడియా వేదికగా స్పందిస్తూ.. "ప్రేక్షకుల పాత ఆలోచనలను, అంచనాలను సవాలు చేసే పాత్రలు చేయడమే ఒక నటిగా నాకు ఎంతో ఉత్సాహాన్ని ఇస్తుంది. శూర్పణఖ పాత్రలోని రకరకాల కోణాలు నన్ను బాగా ఆకట్టుకున్నాయి. సినిమా విడుదలయ్యాక ప్రేక్షకులు ఈ పాత్రను ఒక కొత్త కోణంలో చూస్తారు" అని ధీమా వ్యక్తం చేసింది.