Ram Charan: వైద్యులకు రామ్ చరణ్ కృతజ్ఞతలు.. విజయవంతంగా ముగిసిన మణికట్టు చికిత్స..
మణికట్టు చికిత్స..
Ram Charan: గ్లోబల్ స్టార్ రామ్ చరణ్ కోయంబత్తూరులోని ప్రముఖ గంగా ఆసుపత్రి వైద్యులకు, సిబ్బందికి ప్రత్యేక కృతజ్ఞతలు తెలుపుతూ సోషల్ మీడియాలో భావోద్వేగ పోస్ట్ పెట్టారు. ఇటీవల తనకు జరిగిన మణికట్టు శస్త్రచికిత్సకు సంబంధించిన తదుపరి వైద్య ప్రక్రియ విజయవంతంగా పూర్తి కావడంతో ఆయన ఈ పోస్ట్ పంచుకున్నారు.
గాయం నేపథ్యం – కొనసాగిన చికిత్స
దర్శకుడు బుచ్చిబాబు సానా కాంబినేషన్లో తెరకెక్కుతున్న ప్రతిష్టాత్మక చిత్రం పెద్ది షూటింగ్ సమయంలో రామ్ చరణ్ మణికట్టుకు తీవ్ర గాయమైంది. దీంతో కొన్ని వారాల క్రితం కోయంబత్తూరులోని గంగా హాస్పిటల్లో ఆయన సర్జరీ చేయించుకున్నారు. తాజాగా ఆ గాయానికి సంబంధించిన తదుపరి చికిత్సా ప్రక్రియలను కూడా అక్కడి వైద్య నిపుణుల పర్యవేక్షణలో పూర్తి చేసుకున్నారు.
డాక్టర్ల బృందానికి ప్రత్యేక ధన్యవాదాలు
చికిత్స విజయవంతంగా ముగిసిన అనంతరం రామ్ చరణ్ స్పందిస్తూ.. అత్యుత్తమ నైపుణ్యంతో వైద్యం అందించిన డాక్టర్ ఎస్. రాజా సభాపతి, డాక్టర్ ఎస్. రాజశేఖరన్, డాక్టర్ ప్రవీణ్ భరద్వాజ్లకు ప్రత్యేకంగా ధన్యవాదాలు తెలిపారు. "గంగా ఆసుపత్రిలోని డాక్టర్లు, నర్సులు, ప్రతి ఒక్క సిబ్బంది నన్ను ఎంతో ఆప్యాయంగా చూసుకున్నారు. వారు అందించిన సంరక్షణ, చూపిన ప్రత్యేక శ్రద్ధ మరువలేనివి. వారి సేవలకు నేనెప్పుడూ రుణపడి ఉంటాను" అని రామ్ చరణ్ తన పోస్టులో పేర్కొన్నారు.
గంగా ఆసుపత్రికి అరుదైన అవార్డు.. చరణ్ అభినందనలు
చికిత్స వివరాలతో పాటు గంగా ఆసుపత్రి దక్కించుకున్న అంతర్జాతీయ స్థాయి గుర్తింపును కూడా చరణ్ ప్రస్తావించారు. మెడికల్ రీసెర్చ్ విభాగంలో అత్యంత ప్రతిష్ఠాత్మకమైన "నాస్ అవుట్స్టాండింగ్ రీసెర్చ్ పేపర్ అవార్డు"ను గంగా ఆసుపత్రి ఐదోసారి కైవసం చేసుకోవడంపై హర్షం వ్యక్తం చేస్తూ, హాస్పిటల్ యాజమాన్యానికి హృదయపూర్వక అభినందనలు తెలిపారు.
ప్రస్తుతం రామ్ చరణ్ చేసిన ఈ పోస్ట్ సోషల్ మీడియాలో వైరల్ అవుతుండగా, తమ అభిమాన హీరో త్వరగా పూర్తిగా కోలుకుని తిరిగి 'పెద్ది' సెట్స్లో అడుగుపెట్టాలని అభిమానులు ఆకాంక్షిస్తున్నారు.
