Ram Pothineni: అభిమానులకు రామ్ పోతినేని గుడ్ న్యూస్ !

Ram Pothineni: రామ్ పోతినేని పుట్టినరోజు వేడుకలకు రంగం సిద్ధమైంది. మే 15న ఆయన పుట్టినరోజు సందర్భంగా అభిమానులంతా ఎంతో ఆసక్తిగా ఎదురుచూస్తున్న అప్‌డేట్ రాబోతోంది. సాధారణంగా టాలీవుడ్ స్టార్ హీరోలు తమ పుట్టినరోజున కొత్త సినిమాల ఫస్ట్ లుక్ లేదా టీజర్లను విడుదల చేస్తుంటారు. అదే బాటలో ఈ శుక్రవారం రామ్ తన తదుపరి ప్రాజెక్ట్ గురించి భారీ ప్రకటన చేయనున్నట్లు తెలుస్తోంది.

గతేడాది నవంబర్‌లో విడుదలైన 'ఆంధ్రా కింగ్ తాలుకా' ఆశించిన స్థాయిలో విజయం సాధించకపోవడంతో, రామ్ తన తదుపరి సినిమా విషయంలో చాలా జాగ్రత్తలు తీసుకుంటున్నారు. గత ఆరు నెలలుగా కథలను వింటూ సరైన సబ్జెక్ట్ కోసం వేచి చూసిన ఆయన, ఇప్పుడు ఒక నిర్ణయానికి వచ్చినట్లు సమాచారం. అయితే ఈ సినిమాకు సంబంధించి సోషల్ మీడియాలో ఒక ఆసక్తికరమైన చర్చ నడుస్తోంది. రామ్ కేవలం నటుడిగానే కాకుండా, ఈసారి దర్శకుడిగా కూడా అరంగేట్రం చేయబోతున్నట్లు వార్తలు వస్తున్నాయి.

రామ్ పోతినేని గతంలోనే పాటలు రాయడం, పాడటం మరియు కథా చర్చల్లో చురుగ్గా పాల్గొనడం వంటివి చేశారు. ఇప్పుడు ఒక అడుగు ముందుకేసి మెగాఫోన్ పట్టబోతున్నారనే వార్త ఫిలిం నగర్ వర్గాల్లో హాట్ టాపిక్ గా మారింది. లోకేష్ కనగరాజ్ శిష్యుడి దర్శకత్వంలో సినిమా ఉంటుందని కొందరు, కాదు రామ్ స్వయంగా ఒక భారీ సైన్స్ ఫిక్షన్ యాక్షన్ సినిమాను తెరకెక్కించబోతున్నారని మరికొందరు అంటున్నారు. ఏది ఏమైనా, మే 15న రామ్ తన కొత్త ప్రయాణం గురించి పూర్తి స్పష్టత ఇచ్చే అవకాశం ఉంది.