Telangana Film Distribution: అద్దె వర్సెస్ వాటా: తెలంగాణ సినీ పంపిణీలో మొదలైన కొత్త పోరు!

Telangana Film Distribution: తెలంగాణ చిత్ర పరిశ్రమలో థియేటర్ల ఆదాయం పంపకాలపై ప్రస్తుతం పెను వివాదం నడుస్తోంది. హైదరాబాద్‌లోని కీలకమైన 23 థియేటర్లలో అద్దె పద్ధతికి బదులుగా 'పర్సంటేజ్ షేరింగ్' విధానాన్ని అమలు చేయాలని తెలంగాణ ఫిల్మ్ ఛాంబర్ ఆఫ్ కామర్స్ తీసుకున్న నిర్ణయం పెద్ద దుమారాన్నే రేపింది. ఈ కొత్త ప్రతిపాదన ప్రకారం సినిమా వసూళ్లలో మొదటి వారం థియేటర్లకు 60 శాతం, రెండో వారం 50 శాతం, మూడో వారం నుంచి 40 శాతం వాటా ఇవ్వాల్సి ఉంటుంది. ఈ విధానం ఇప్పటికే ఉత్తర భారతదేశం, తమిళనాడు, కేరళలో అమల్లో ఉన్నప్పటికీ తెలుగు రాష్ట్రాల్లో మాత్రం ఇప్పటికీ పాత అద్దె పద్ధతే కొనసాగుతోంది.

అయితే ఫిల్మ్ ఛాంబర్ తీసుకున్న ఈ ఏకపక్ష నిర్ణయాన్ని యాక్టివ్ ప్రొడ్యూసర్స్ గిల్డ్ తీవ్రంగా వ్యతిరేకిస్తోంది. ఈ కొత్త నిబంధనను ఒప్పుకునే ప్రసక్తే లేదని, పర్సంటేజ్ పద్ధతిని అమలు చేసే థియేటర్లలో తమ సినిమాలను విడుదల చేయబోమని నిర్మాతలు స్పష్టం చేశారు. దీంతో ఈ సమస్య మళ్లీ మొదటికి వచ్చి పడింది. నిజానికి అద్దె పద్ధతిలో అయితే థియేటర్‌కు నిర్ణీత మొత్తాన్ని చెల్లించిన తర్వాత మిగిలిన లాభాలన్నీ డిస్ట్రిబ్యూటర్లకు, నిర్మాతలకు దక్కుతాయి. కానీ పర్సంటేజ్ పద్ధతి వస్తే వసూళ్లలో ఎక్కువ భాగం థియేటర్ యజమానులకే వెళ్తుందని, దీనివల్ల నిర్మాతలు నష్టపోతారని గిల్డ్ వాదిస్తోంది.

ఈ గొడవ వెనుక నిజాం ఏరియాలో పట్టు కోసం జరుగుతున్న పెద్ద యుద్ధమే కనిపిస్తోంది. ఇన్నాళ్లుగా సురేష్ బాబు, సునీల్ నారంగ్, దిల్ రాజు వంటి అగ్ర నిర్మాతలు, పంపిణీదారులు ఈ ప్రాంతంపై పట్టు సాధించి ఉన్నారు. ఇప్పుడు వారి ఆధిపత్యాన్ని తగ్గించేందుకు మైత్రీ మూవీ మేకర్స్ వంటి కొత్త సంస్థలు పంపిణీ రంగంలోకి దిగడమే కాకుండా సొంతంగా థియేటర్లను కూడా ఏర్పాటు చేసుకుంటున్నాయి. ఈ నేపథ్యంలో పాత పద్ధతిని మార్చాలని ఎగ్జిబిటర్లు ప్రయత్నిస్తుంటే, తమ లాభాలను కాపాడుకోవాలని నిర్మాతలు పట్టుబడుతున్నారు. ఈ పోరు తెలుగు సినీ వ్యాపారంలో ఎలాంటి మార్పులకు దారితీస్తుందో చూడాలి.