Samantha: సమంత సీమంతం వేడుకలు.. భర్త రాజ్ నిడిమోరు, స్నేహితురాలు శిల్పారెడ్డి సందడి

Samantha: టాలీవుడ్ నటి సమంత తన ప్రెగ్నెన్సీ జర్నీకి సంబంధించిన పలు ఆసక్తికరమైన విషయాలను సోషల్ మీడియాలో అభిమానులతో పంచుకుంటున్న విషయం తెలిసిందే. తాజాగా ఓ ఆధ్యాత్మిక ఆశ్రమంలో తన కోసం నిర్వహించిన సంప్రదాయ వేడుకకు సంబంధించిన ఫొటోలు, వీడియోలను ఆమె ఇన్‌స్టాగ్రామ్‌లో షేర్ చేసింది. ఈ వేడుకలో మంగళస్నానం నిర్వహించగా.. సీమంతం లేదా బేబీ షవర్‌ను తలపించేలా సంప్రదాయ పద్ధతుల్లో కార్యక్రమం జరిగింది. సమంత కుటుంబ సభ్యులు, సన్నిహితులు ఈ వేడుకలో పాల్గొని సందడి చేశారు.

ఈ వేడుకకు సమంత భర్త, సినీ దర్శకుడు రాజ్ నిడిమోరు కూడా హాజరయ్యారు. ఆమె సన్నిహితురాలు శిల్పారెడ్డి కూడా వేడుకలో కనిపించారు. సంప్రదాయ దుస్తులు, ఆధ్యాత్మిక వాతావరణం మధ్య జరిగిన ఈ కార్యక్రమానికి సంబంధించిన దృశ్యాలు ప్రస్తుతం సోషల్ మీడియాలో వైరల్‌గా మారాయి. సమంత తన జీవితంలో మాతృత్వం వైపు అడుగులు వేస్తున్న ఈ ప్రత్యేక దశను అభిమానులతో పంచుకోవడంతో ఆమె అభిమానులు ఆనందం వ్యక్తం చేస్తున్నారు.

ఈ వేడుక తనను ఎంతగానో కదిలించిందని సమంత పేర్కొంది. ఈ సంప్రదాయంలో తల్లిని దేవతగా భావించి గౌరవించే విధానం తనను ప్రత్యేకంగా ఆకట్టుకుందని తెలిపింది. తనలో మరో ప్రాణం రూపుదిద్దుకునే పవిత్ర సృష్టికర్తగా తల్లిని గౌరవించడం ఎంతో గొప్ప విషయమని చెప్పింది. గర్భంలో పెరుగుతున్న శిశువుకు మాత్రమే కాకుండా.. తనలో కొత్త రూపంలో పుడుతున్న మహిళకు కూడా ఇది ఒక ఆశీర్వాదమని సమంత తన భావాలను పంచుకుంది.

39 ఏళ్ల సమంత గత ఏడాది డిసెంబర్‌లో దర్శకుడు రాజ్ నిడిమోరును వివాహం చేసుకుంది. ఈ ఏడాది జూన్‌లో ఈ దంపతులు తాము తల్లిదండ్రులు కాబోతున్న విషయాన్ని అధికారికంగా ప్రకటించారు. అప్పటి నుంచి మాతృత్వానికి సంబంధించిన వివిధ అనుభవాలను సమంత సోషల్ మీడియా వేదికగా అభిమానులతో పంచుకుంటోంది. తన జీవితంలో చోటుచేసుకుంటున్న ఈ కొత్త దశకు సంబంధించిన ప్రతి ప్రత్యేక క్షణాన్ని ఫొటోలు, వీడియోల రూపంలో అభిమానులకు చూపిస్తూ వస్తోంది. తాజాగా నిర్వహించిన ఈ సంప్రదాయ వేడుకతో సమంత మాతృత్వ ప్రయాణంలో మరో అందమైన అధ్యాయం చేరింది.