Actress Anandi Ajay: విజయ్ మూవీలో సీన్స్ కట్... కన్నీళ్లు పెట్టుకున్న నటి ఆనంది అజయ్..

Actress Anandi Ajay: స్టార్ హీరోల సినిమాల్లో చిన్న పాత్ర దొరికినా తమ కెరీర్‌కు మైలేజ్ వస్తుందని ప్రతీ నటీనటుడు భావిస్తారు. అయితే, దాదాపు ఏడాది పాటు ఎంతో కష్టపడి నటించిన తర్వాత, చివర్లో ఎడిటింగ్ టేబుల్‌పై ఆ పాత్రే లేకుండా పోతే అనుభవించే బాధ వర్ణనాతీతం. ప్రస్తుతం తమిళ చిన్నతెర నటి, ప్రముఖ డ్యాన్సర్ ఆనంది అజయ్ సరిగ్గా ఇలాంటి తీవ్ర మనస్తాపానికి గురయ్యారు. దళపతి విజయ్ ప్రధాన పాత్రలో రూపొందిన ప్రతిష్టాత్మక చిత్రం జన నాయగన్ నుంచి తన సన్నివేశాలను పూర్తిగా తొలగించారని తెలుపుతూ ఆమె సోషల్ మీడియాలో పోస్ట్ చేసిన వీడియో నెట్టింట తీవ్ర చర్చనీయాంశమైంది.

ఒక్క అవకాశం పోయింది.. కన్నీటి పర్యంతమైన నటి

సోషల్ మీడియా ద్వారా తన ఆవేదనను పంచుకున్న ఆనంది అజయ్ ఆ వీడియోలో భావోద్వేగానికి గురయ్యారు. "విజయ్ సర్ లాంటి స్టార్ హీరో పక్కన నటించే అవకాశం వచ్చిందని ఎంతో సంబరపడ్డాను. ఈ ప్రాజెక్ట్ కోసం ఏడాదంతా కష్టపడి పనిచేశాను. కానీ, ఇప్పుడు నా పాత్రను సినిమా నుంచి తీసేశారనే విషయం నన్ను తీవ్రంగా కలిచివేసింది" అని ఆమె వాపోయారు. విజయ్ కి ఇదే చివరి సినిమా కావడంతో ఆయనతో కలిసి స్క్రీన్ షేర్ చేసుకునే మరో అవకాశం ఇక దక్కదనే నిరాశే తనను మరింత కుంగదీసిందని ఆమె పేర్కొన్నారు.

ధైర్యం చెప్తున్న నెటిజన్లు - ఫ్యాన్స్

ఆనంది పోస్ట్ చేసిన భావోద్వేగ వీడియోపై నెటిజన్లు, విజయ్ అభిమానులు పెద్ద ఎత్తున స్పందిస్తున్నారు. "జరిగిన దానికి బాధపడకండి.. ధైర్యంగా ఉండండి. మీ కష్టానికి తగిన ప్రతిఫలం లభిస్తుంది. భవిష్యత్తులో ఇంతకంటే గొప్ప అవకాశాలు మిమ్మల్ని వెతుక్కుంటూ వస్తాయి" అంటూ ఆమెకు అండగా కామెంట్లు పెడుతున్నారు. అభిమానుల నుంచి వస్తున్న ఈ మద్దతు ఆమెకు కొంత ఉపశమనాన్ని ఇస్తోంది.

ఎవరీ ఆనంది అజయ్?

తమిళ బుల్లితెర ప్రేక్షకులకు ఆనంది అజయ్ సుపరిచితమైన నటి. కార్తిగై పెంగళ్, యమునా, కనా కానుమ్ కాలంగళ్ వంటి ప్రజాదరణ పొందిన ధారావాహికల్లో నటించి మంచి గుర్తింపు తెచ్చుకున్నారు. ఈమె మంచి క్లాసికల్ డ్యాన్సర్ మాత్రమే కాకుండా యోగా ప్రాక్టీషనర్ కూడా. డ్యాన్స్ జోడీ డ్యాన్స్ 3.0, జోడీ నెం.1 వంటి పాపులర్ డ్యాన్స్ రియాలిటీ షోల ద్వారా తన ప్రతిభను చాటుకున్నారు. సినిమా రంగంలో ఇలాంటి చేదు అనుభవాలు ఎదురవ్వడం సాధారణమే అయినప్పటికీ, విజయ్ చివరి ప్రాజెక్ట్ కావడంతో ఆనంది వ్యక్తం చేసిన ఆవేదన అందరినీ ఆలోచింపజేస్తోంది.