OG Movie: పవర్ స్టార్ పవన్ కల్యాణ్ అభిమానులు ఆసక్తిగా ఎదురుచూస్తున్న 'ఓజీ' చిత్రం నుంచి మరో పాట విడుదలైంది. వినాయక చవితి పండుగను పురస్కరించుకుని చిత్ర బృందం ఇవాళ ఉదయం 10:08 గంటలకు 'సువ్వి సువ్వి' పేరుతో రెండో పాటను విడుదల చేసింది. ఈ పాట పవన్ కల్యాణ్ - హీరోయిన్ ప్రియాంక అరుల్ మోహన్ మధ్య రొమాంటిక్ కెమిస్ట్రీని అందంగా చూపించింది. పండగ వాతావరణంలో సాగే ఈ పాట అభిమానులను ఎంతగానో ఆకట్టుకుంటోంది. ఇప్పటికే విడుదలైన 'ఫైర్ స్ట్రోమ్' పాట భారీ విజయం సాధించగా, ఇప్పుడు పూర్తి భిన్నమైన ప్రేమ గీతాన్ని విడుదల చేయడం ద్వారా 'ఓజీ'లో అన్ని రకాల ఎమోషన్స్ ఉంటాయని చిత్ర యూనిట్ స్పష్టం చేసింది.
షూటింగ్ పూర్తి, విడుదల తేదీ ఖరారు
గత కొన్ని రోజులుగా 'ఓజీ' షూటింగ్ పూర్తి కాలేదని, సినిమా విడుదల వాయిదా పడవచ్చని వచ్చిన పుకార్లకు చిత్ర బృందం తాజాగా చెక్ పెట్టింది. సినిమా చిత్రీకరణ మొత్తం పూర్తయిందని, ముందుగా ప్రకటించినట్టుగానే సెప్టెంబర్ 25న ప్రపంచవ్యాప్తంగా థియేటర్లలోకి రావడం ఖాయమని వెల్లడించింది. అంతేకాకుండా అమెరికాలో సెప్టెంబర్ 24 నుంచే ప్రీమియర్ షోలు ప్రారంభం కానున్నాయని, దీనికి సంబంధించిన అడ్వాన్స్ బుకింగ్స్‌ను ఈ నెల 29 నుంచి మొదలుపెట్టనున్నట్లు తెలిపింది.
డీవీవీ ఎంటర్‌టైన్‌మెంట్ పతాకంపై డీవీవీ దానయ్య, కల్యాణ్ దాసరి నిర్మిస్తున్న ఈ చిత్రంలో బాలీవుడ్ నటుడు ఇమ్రాన్ హష్మీ విలన్‌గా నటిస్తున్నారు. ప్రకాశ్ రాజ్, శ్రియా రెడ్డి, హరీశ్ ఉత్తమన్ వంటి ప్రముఖ నటులు కీలక పాత్రలు పోషిస్తున్నారు. వరుసగా పాటలను విడుదల చేస్తూ సినిమా ప్రమోషన్లలో వేగం పెంచిన 'ఓజీ' టీం, సినిమాపై హైప్‌ను మరింత పెంచుతోంది.
