‘Shiva’ Re-Release: శివ రీరిలీజ్.. మెగాస్టార్‌కి రామ్ గోపాల్ వర్మ క్షమాపణలు..

‘Shiva’ Re-Release: "తెలియకుండా మిమ్మల్ని ఎప్పుడైనా బాధపెట్టి ఉంటే నన్ను క్షమించండి" అంటూ సంచలన దర్శకుడు రామ్ గోపాల్ వర్మ మెగాస్టార్ చిరంజీవికి క్షమాపణలు తెలిపారు. తెలుగు సినిమా గతిని మార్చిన శివ చిత్రం రీరిలీజ్ సందర్భంగా.. ఆ సినిమాపై, తనపై చిరంజీవి ప్రశంసలు కురిపిస్తూ ఓ వీడియో విడుదల చేయడంతో వర్మ ఈ విధంగా స్పందించారు. అక్కినేని నాగార్జున హీరోగా RGV దర్శకత్వంలో 1989లో వచ్చిన కల్ట్ క్లాసిక్ శివ, నవంబర్ 14న థియేటర్లలో గ్రాండ్‌గా రీరిలీజ్ కానుంది. ఈ నేపథ్యంలో చిరంజీవి ది పంచ్ ఆఫ్ శివ డాక్యుమెంటరీలో తన అభిప్రాయాలను పంచుకున్నారు. శివ ఒక విప్లవం: శివ ఒక సినిమా కాదని, అదొక విప్లవమని చిరంజీవి అభివర్ణించారు. ఆ సినిమా చూసినప్పుడు షాకింగ్‌గా అనిపించిందని, తెలుగు సినిమాకు కొత్త ఒరవడి సృష్టించిందని కొనియాడారు. ముఖ్యంగా సైకిల్ చైన్ లాగే సన్నివేశాన్ని ఇప్పటికీ మర్చిపోలేనని, అది తన మనసులో కల్ట్ సీన్‌గా నిలిచిపోయిందని గుర్తుచేసుకున్నారు.

ఈ క్లాసిక్ వెనుక ఉన్న ముఖ్యమైన వ్యక్తి రామ్ గోపాల్ వర్మేనని, ఆయన విజన్, కెమెరా యాంగిల్స్, సౌండ్ ప్రజెంటేషన్ అద్భుతంగా ఉన్నాయని ప్రశంసించారు.

"చెన్నైలో సినిమా చూశాక, ఆయన్ను అభినందించడానికి పూల బొకే పంపడమే కాకుండా, ఫోన్ చేసి మాట్లాడాను. ఆ యువ దర్శకుడే తెలుగు సినిమా భవిష్యత్ అని ఆ రోజే అనిపించింది" అని చిరంజీవి నాటి సంగతులను గుర్తుచేసుకున్నారు.

చిరంజీవి చూపించిన ఈ గొప్ప మనసుకు వర్మ స్పందిస్తూ.. "గతంలో నా ప్రవర్తన పట్ల మనస్ఫూర్తిగా క్షమాపణలు తెలుపుకుంటున్నాను" అంటూ ట్వీట్ చేశారు. చిరంజీవి గొప్పతనాన్ని ఈ సందర్భంగా ఆయన కొనియాడారు.