‘Eetha’ Release Date Confirmed: లక్కీ డైరెక్టర్‌తో శ్రద్ధా కపూర్ భారీ బయోపిక్.. ‘ఈథా’ రిలీజ్ డేట్ ఖరారు!

‘Eetha’ Release Date Confirmed: ‘మిమి’ వంటి విలక్షణమైన సినిమాతో పాటు ఇటీవల భారీ బ్లాక్‌బస్టర్ హిట్‌గా నిలిచిన ‘ఛావా’ చిత్రంతో బాలీవుడ్‌లో సెన్సేషన్ క్రియేట్ చేసిన లక్కీ డైరెక్టర్ లక్ష్మణ్ ఉతేకర్.. తాజాగా బాలీవుడ్ స్టార్ బ్యూటీ శ్రద్ధా కపూర్‌తో తన తదుపరి ప్రతిష్టాత్మక ప్రాజెక్ట్‌ను అధికారికంగా ప్రకటించారు.

ఈ చిత్రానికి ఈథా అనే పవర్‌ఫుల్ టైటిల్‌ను ఖరారు చేశారు. మహారాష్ట్రకు చెందిన ప్రముఖ జానపద కళాకారిణి, తమాషా (సాంప్రదాయ నృత్య రూపం) లెజెండ్ విఠాబాయి నారాయణగాంకర్ జీవిత కథ ఆధారంగా ఈ బయోపిక్ రూపుదిద్దుకుంటోంది. 1940 నుండి 1990 వరకు ఆమె జీవితంలో ఎదురైన అద్భుతమైన సంఘటనలు, విజయాలు, కన్నీళ్లు మరియు కష్టాల చుట్టూ ఈ జీవిత చరిత్ర సాగనుంది.

మ్యాడక్ ఫిల్మ్స్ బ్యానర్‌పై స్టార్ ప్రొడ్యూసర్ దినేష్ విజన్ ఈ చిత్రాన్ని అత్యంత భారీ బడ్జెట్‌తో నిర్మిస్తున్నారు. ‘ఛావా’ చిత్రానికి పనిచేసిన సక్సెస్‌ఫుల్ టీమ్ అంతా మళ్లీ ఈ సినిమా కోసం చేతులు కలిపారు. ఇందులో శ్రద్ధా కపూర్ టైటిల్ రోల్ (విఠాబాయి) పోషిస్తుండగా, విలక్షణ నటులు రణదీప్ హుడా, మహ్మద్ జీషన్ అయ్యూబ్ కీలక పాత్రల్లో నటిస్తున్నారు.

మహారాష్ట్రలోని సోలాపూర్, సతారా, నాసిక్ మరియు భోర్ వంటి పలు అందమైన లొకేషన్లలో దాదాపు 60 రోజుల పాటు జరిపిన సుదీర్ఘ షెడ్యూల్‌తో ఈ సినిమా షూటింగ్ ఇప్పటికే విజయవంతంగా పూర్తయింది. ఈ చిత్రం యొక్క ముగింపు సాంగ్ కోసం ఏకంగా 800 మంది బ్యాక్‌గ్రౌండ్ డాన్సర్లతో ఒక భారీ మాంటేజ్ సాంగ్‌ను వైభవి మర్చంట్ నేతృత్వంలో చిత్రీకరించారు. భారతీయ సాంస్కృతిక చరిత్రలో ఒక స్ఫూర్తిదాయకమైన అధ్యాయాన్ని ఈ సినిమా ద్వారా చూపించబోతున్నారు. ఒక సుదీర్ఘ విరామం తర్వాత శ్రద్ధా కపూర్ నటిస్తున్న ఈ బయోపిక్, ఆమె కెరీర్‌లోనే అత్యంత సవాలుతో కూడిన పాత్రగా నిలుస్తుందని ఇండస్ట్రీ వర్గాలు అంటున్నాయి. ఈ భారీ పీరియడ్ డ్రామా చిత్రానికి బాలీవుడ్ మ్యూజిక్ లెజెండ్స్ అజయ్-అతుల్ సంగీతం అందిస్తున్నారు.