ఐపీఎస్ అధికారి నుంచి నటి వరకు… సిమాలా ప్రసాద్ ద్విపాత్రాభినయం

ఐపీఎస్ అధికారి గానే కాకుండా నటిగా కూడా తన ప్రతిభను చాటుకుంటున్న సిమాలా ప్రసాద్ మరో ప్రత్యేకమైన ప్రాజెక్ట్‌తో ప్రేక్షకుల ముందుకు రానున్నారు. ప్రస్తుతం డీఐజీ (డిప్యూటీ ఇన్‌స్పెక్టర్ జనరల్)గా పనిచేస్తున్న ఆమె, నిజ సంఘటనల ఆధారంగా తెరకెక్కుతున్న క్రైమ్ డ్రామా “నర్మద”లో ధైర్యవంతమైన దర్యాప్తు అధికారిణి పాత్రలో కనిపించనున్నారు. రియల్ లైఫ్‌లోనూ పోలీస్ అధికారిణిగా, రీల్ లైఫ్‌లోనూ అదే తరహా పాత్రలో నటిస్తూ మహిళా సాధికారతకు ఆదర్శంగా నిలుస్తున్నారు.

ప్రస్తుతం మీ హోదా ఏమిటి? నటనకు డిపార్ట్మెంట్ అనుమతులు ఎలా?

“ఇటీవలనే నేను డీఐజీ (డిప్యూటీ ఇన్‌స్పెక్టర్ జనరల్)గా పదోన్నతి పొందాను. అంతకుముందు మూడు జిల్లాల్లో ఎస్పీగా పనిచేశాను. నేను 2011 బ్యాచ్ ఐపీఎస్ అధికారి. సినిమాల్లో నటించాలంటే ముందుగా మా విభాగం నుంచి అనుమతి తీసుకోవాలి. ఆ తర్వాత రాష్ట్ర ప్రభుత్వం, చివరగా కేంద్ర హోం మంత్రిత్వ శాఖ (MHA) ఆమోదం అవసరం. కథ ఆధారంగా అనుమతి ఇస్తారు.”

పోలీస్ కెరీర్, నటన—ఇవీ రెండింటిని ఎలా బ్యాలెన్స్ చేస్తున్నారు?

“నటన నా ఫుల్ టైమ్ ప్రొఫెషన్ కాదు. ఇది నా మూడో సినిమా మాత్రమే. అవసరమైన అనుమతులు తీసుకుని రెండు బాధ్యతలను సమతుల్యంగా నిర్వహిస్తున్నాను.”

పోలీస్ ఆఫీసర్, నటిగా తేడా ఏమిటి?

“పోలీస్‌గా మేము నిజ జీవిత సమస్యలను చూస్తాం—ఒక్కో వ్యక్తి జీవితంలోని ఒక కోణాన్ని మాత్రమే. కానీ నటిగా ఒక పాత్ర జీవితాన్ని పూర్తిగా అర్థం చేసుకుని, భావోద్వేగంతో చూపించాలి. ఇది చాలా లోతైన పరిశీలన అవసరం.”

“నర్మద”లో మీ పాత్ర గురించి చెప్పండి?

“ఈ సినిమాలో ‘నర్భద’ అనే సబ్ ఇన్‌స్పెక్టర్ పాత్రలో నటిస్తున్నాను. నిజ జీవితంలో నేను ఉన్న ర్యాంక్ కంటే ఈ పాత్ర వేరుగా ఉంటుంది. కథ కూడా భిన్నంగా ఉంటుంది.”

సినిమాకు ‘నర్మద’ అనే పేరు ఎందుకు?

“ఈ పాత్ర పేరు నర్మద నది పేరుమీదుగా ఉంటుంది. కథలో ఆమె తల్లి ఒక టీచర్, అలాగే NGO కార్యకర్త. నది పరిరక్షణలో ఆసక్తి ఉండటంతో తన కూతురికి ఆ పేరు పెడుతుంది.”

మీ అనుభవాలను స్క్రిప్ట్‌లో చేర్చారా?

“నేరుగా కాదు. రచయిత జేగర్ ఇమామ్ పోలీసింగ్‌పై విస్తృతంగా పరిశోధన చేశారు. కథ నిజానికి దగ్గరగా ఉందని నమ్మి నేను ఒప్పుకున్నాను.”

మీకు నటనలో శిక్షణ ఉందా?

“ప్రత్యేకంగా లేదు. స్కూల్, కాలేజీ రోజులలో థియేటర్‌లో పాల్గొనడం మాత్రమే జరిగింది.”

ఫిల్మ్ ఇండస్ట్రీలో మీ అనుభవం ఎలా ఉంది?

“చాలా మంచి అనుభవం. నా సహనటులు చాలా అనుభవజ్ఞులు. వాళ్ల నుంచి చాలా నేర్చుకున్నాను.”

సినిమా ఎప్పుడు విడుదల కానుంది?

“ఈ సమ్మర్‌లో విడుదల కావొచ్చు. కానీ ఖచ్చితమైన తేదీ ఇంకా నిర్ణయించలేదు.”

రెండు కెరీర్లను కొనసాగిస్తారా?

“అవును. పోలీసింగ్ ద్వారా నేరుగా సమాజానికి సేవ చేయవచ్చు. సినిమాల ద్వారా మంచి సందేశాలు ఇవ్వవచ్చు. రెండు కూడా పరస్పరం సహకరిస్తాయి.”

భవిష్యత్తులో ఎలాంటి పాత్రలు చేస్తారు?

“సామాజిక సమస్యలను ప్రతిబింబించే, సమాజానికి ఉపయోగపడే కథలను మాత్రమే ఎంచుకుంటాను.”

మహిళలపై నేరాలపై మీ అభిప్రాయం?

“సమస్య ప్రధానంగా సెన్సిటివిటీ లోపం. బాధితులను నిందించడం, సోషల్ మీడియాలో అనుచిత వ్యాఖ్యలు పరిస్థితిని మరింత దిగజారుస్తాయి. సమాజం మరింత బాధ్యతగా ఉండాలి.”

సోషల్ మీడియాలో ప్రజలు ఎలా వ్యవహరించాలి?

“ప్రతి ఒక్కరూ బాధ్యతగా ఉండాలి. అసహజమైన, నెగెటివ్ పోస్టులు బాధితులను మరింత బాధిస్తాయి. సహానుభూతి, అవగాహన అవసరం.”

మిస్సింగ్ కేసులు హ్యాండిల్ చేశారా?

“అవును, చాలా కేసులు చూసాను. నా అనుభవాల ఆధారంగా ‘She Goes Missing’ అనే పుస్తకం కూడా రాశాను.”

మీ అనుభవాలను సినిమాగా చేయాలనుకుంటారా?

“సరైన అవకాశం వస్తే తప్పకుండా చేస్తాను.”

సమాజానికి, ముఖ్యంగా మహిళలకు మీ సందేశం

“మనం ముందుగా మనుషులం. లింగం, వృత్తి అనే భేదాలు పక్కనపెట్టి పరస్పరం సహాయం చేసుకోవాలి. మనకే కాదు, ఇతరుల కోసం కూడా నిలబడాలి.”

చివరిగా :

సిమాలా ప్రసాద్… ఒక వైపు కఠినమైన పోలీస్ అధికారి, మరోవైపు భావోద్వేగభరితమైన నటి. ఈ రెండు పాత్రలతో సమాజానికి సేవ చేస్తూ, మహిళా సాధికారతకు ఒక శక్తివంతమైన సందేశాన్ని అందిస్తున్నారు.