Srinivasa Mangapuram: శ్రీనివాస మంగాపురం.. రన్టైమ్ లాక్.. ఘట్టమనేని వారసుడి ఎంట్రీపై భారీ అంచనాలు
ఘట్టమనేని వారసుడి ఎంట్రీపై భారీ అంచనాలు
Srinivasa Mangapuram: తన తొలి చిత్రం RX 100తో టాలీవుడ్లో రా అండ్ రస్టిక్ కథలతో సంచలనం సృష్టించిన డైరెక్టర్ అజయ్ భూపతి, ఈసారి ఒక గాఢమైన ప్రేమకథతో బాక్సాఫీస్ వద్దకు వచ్చేందుకు సిద్ధమయ్యారు. ఆయన దర్శకత్వంలో తెరకెక్కిన తాజా చిత్రం శ్రీనివాస మంగాపురం. ఈ సినిమా సెన్సార్, రన్టైమ్కు సంబంధించి తాజాగా అధికారిక ప్రకటన వెలువడింది. సినిమా నిడివి పరంగా దర్శకుడు ఎంతో స్పష్టతతో ఉన్నట్లు తెలుస్తోంది. ఈ చిత్రాన్ని 2 గంటల 35 నిమిషాల నిడివితో ప్రేక్షకుల ముందుకు తీసుకువస్తున్నారు. సాధారణంగా కథపై, స్క్రీన్ప్లేపై బలమైన నమ్మకం ఉంటేనే దర్శకులు ఇలాంటి రన్టైమ్ను ఓకే చేస్తారు. ఈ నిడివి సినిమా ఎంగేజింగ్గా సాగుతుందనే నమ్మకానికి నిదర్శనమని ట్రేడ్ వర్గాలు అంటున్నాయి.
ఘట్టమనేని వారసుడి గ్రాండ్ ఎంట్రీ:
సూపర్స్టార్ ఘట్టమనేని కుటుంబం నుంచి జైకృష్ణ ఈ చిత్రంతోనే హీరోగా టాలీవుడ్ అరంగేట్రం చేస్తున్నారు. బాలీవుడ్ ప్రముఖ నటి రవీనా టాండన్ కుమార్తె రాషా థడానీ ఈ సినిమాతో తెలుగు తెరకు కథానాయికగా పరిచయం అవుతోంది. జైకృష్ణ - రాషా జోడీ కెమిస్ట్రీ ఇప్పటికే విడుదలైన ప్రచార చిత్రాల్లో ఆకట్టుకుంది. సీనియర్ కలెక్షన్ కింగ్ మోహన్ బాబు ఈ సినిమాలో ఒక అత్యంత కీలకమైన, శక్తివంతమైన పాత్రలో కనిపిస్తున్నారు.
దిగ్గజ సంస్థ సమర్పణ..
టాలీవుడ్ దిగ్గజ నిర్మాత సి. అశ్వనీదత్ ఈ చిత్రాన్ని సమర్పిస్తుండటం సినిమా రేంజ్ను పెంచగా, చందమామ కథలు పిక్చర్స్ బ్యానర్పై పి. కిరణ్ నిర్మిస్తున్నారు. భావోద్వేగపూరితమైన సన్నివేశాలకు అద్భుతమైన సంగీతాన్ని అందించే జి.వి. ప్రకాశ్ కుమార్ ఈ చిత్రానికి స్వరాన్ని సమకూర్చడం విశేషం.
జూలై 30న ప్రపంచవ్యాప్తంగా విడుదల..
అజయ్ భూపతి మార్క్ మేకింగ్, ఘట్టమనేని వారసుడి ఎంట్రీ బిగ్ ప్రొడక్షన్ వాల్యూస్ కలగలిసిన శ్రీనివాస మంగాపురం చిత్రాన్ని జూలై 30న ప్రపంచవ్యాప్తంగా గ్రాండ్గా థియేటర్లలో విడుదల చేసేందుకు నిర్మాతలు అన్ని ఏర్పాట్లు పూర్తి చేశారు.
