Shiva Nirvana: శివ నిర్వాణ కోసం స్టార్ హీరోలు క్యూ.. సినిమా చేస్తామని ఆఫర్!
సినిమా చేస్తామని ఆఫర్!
Shiva Nirvana: సంచలన విజయం సాధించిన 'ఇరుముడి' సినిమాతో టాలీవుడ్లో డైరెక్టర్ శివ నిర్వాణ మోస్ట్ వాంటెడ్ దర్శకుడిగా మారిపోయారు. రవితేజ లాంటి మాస్ హీరోని ఫ్యామిలీ సెంటిమెంట్ డ్రామాలో చూపిస్తూ, యాక్షన్, ఎమోషన్ , భక్తి తత్వాలను అద్భుతంగా మిళితం చేసిన తీరు పలువురు స్టార్ హీరోలను ఎంతగానో ఆకట్టుకుంది.
గతంలో శివ నిర్వాణ 'నిన్ను కోరి', 'మజిలీ', 'ఖుషి' లాంటి చిత్రాలు తెరకెక్కించినప్పటికీ, ఆయన గత సినిమాలు ఎక్కువగా మణిరత్నం సినిమాల ప్రభావంతో ఉండేవి. కానీ 'ఇరుముడి' మాత్రం ఆ మూస పద్ధతికి పూర్తిగా భిన్నంగా వచ్చి ఆయనలోని మరో కోణాన్ని పరిచయం చేసింది. ఈ సినిమా విజయం ద్వారా ఆయన గత చిత్రాలైన నిరాశపరిచిన 'టక్ జగదీష్', ఆవరేజ్ టాక్ తెచ్చుకున్న 'ఖుషి' చిత్రాల ఫలితాలను వెనక్కి నెట్టి కెరీర్లో ముందుకు దూసుకెళ్లారు.
విశ్వసనీయ వర్గాల సమాచారం ప్రకారం, శివ నిర్వాణ సరైన కథతో వస్తే ఆయనతో పనిచేయడానికి ఇప్పటికే ముగ్గురు స్టార్ హీరోలు ఆసక్తి చూపుతున్నారు. కోలీవుడ్ స్టార్ సూర్య నేరుగా ఓ తెలుగు సినిమా చేయడానికి శివ నిర్వాణతో జతకట్టేందుకు ఉత్సాహంగా ఉన్నట్లు తెలుస్తోంది. తెలుగు దర్శకుడు వెంకీ అట్లూరి దర్శకత్వంలో సూర్య నటించిన 'విశ్వనాథ్ అండ్ సన్స్' ఇటీవల మంచి విజయం సాధించడంతో, మరో తెలుగు దర్శకుడితో పనిచేయడానికి ఆయన సుముఖంగా ఉన్నారు. ఇప్పుడు సూర్యను మెప్పించే సరైన కథను శివ నిర్వాణ సిద్ధం చేయాల్సి ఉంది.
అలాగే దర్శకుడితో మంచి అనుబంధం ఉన్న యువ నటుడు నాగచైతన్య కూడా మరో ప్రాజెక్ట్ కోసం శివ నిర్వాణతో టచ్లో ఉన్నట్లు సమాచారం. మరోవైపు 'ఇరుముడి' సినిమా చూసిన ధనుష్ స్వయంగా శివ నిర్వాణకు ఫోన్ చేసి ఆయన పనితీరును అభినందించారు. తన కోసం కూడా ఒక మంచి కథను సిద్ధం చేయమని ఆయన కోరినట్లు తెలుస్తోంది.
ఈ ముగ్గురు స్టార్స్లో ముందుగా శివ నిర్వాణకు గ్రీన్ సిగ్నల్ ఇస్తారనేది వేచి చూడాలి. 'ఇరుముడి' సినిమాతో తన కెరీర్కు భారీ బూస్ట్ లభించడంతో, దర్శకుడు తన తదుపరి ప్రాజెక్ట్ను చాలా జాగ్రత్తగా ఎంచుకునే పరిస్థితిలో ఉన్నారు. ఇదిలా ఉంటే, రవితేజ హీరోగా నటించిన 'ఇరుముడి' సినిమా రూ. 200 కోట్ల గ్రాస్ మార్క్ వైపు వేగంగా దూసుకుపోతోంది. బాక్సాఫీస్ వద్ద ఈ సినిమా వసూళ్లు ఇంకా స్ట్రాంగ్గా కొనసాగుతుండటంతో, రెండవ వీకెండ్ నాటికి దీని కలెక్షన్లు మరింత భారీగా పెరిగే అవకాశం ఉంది.
