Suriya’s ‘Viswanath and Sons’: సూర్య ‘విశ్వనాథ్ అండ్ సన్స్’.. రిలీజ్ డేట్ ఫిక్స్!

Suriya’s ‘Viswanath and Sons’: టాలెంటెడ్ హీరో సూర్య ఇటీవలే ‘కరుప్పు’ సినిమాతో భారీ బాక్సాఫీస్ విజయాన్ని అందుకొని మళ్లీ ఫామ్‌లోకి వచ్చారు. చాలా కాలం తర్వాత వచ్చిన ఈ సక్సెస్ జోష్‌తో, ఆయన తన తదుపరి చిత్రం ‘విశ్వనాథ్ అండ్ సన్స్’ విడుదలకు చకచకా ఏర్పాట్లు చేసుకుంటున్నారు.

యాక్షన్, భక్తి అంశాల కలయికతో మాస్ ఆడియన్స్‌ను మెప్పించిన ‘కరుప్పు’ చిత్రానికి భిన్నంగా.. ‘విశ్వనాథ్ అండ్ సన్స్’ ఒక ప్యూర్ ఫ్యామిలీ డ్రామాగా తెరకెక్కుతోంది. టాలెంటెడ్ డైరెక్టర్ వెంకీ అట్లూరి దర్శకత్వంలో రూపొందుతున్న ఈ సినిమాను.. స్వాతంత్ర్య దినోత్సవ లాంగ్ వీకెండ్‌ను టార్గెట్ చేస్తూ ఆగస్టు 14, 2026న థియేటర్లలోకి తీసుకురాబోతున్నట్లు నిర్మాత నాగవంశీ ఈరోజు అధికారికంగా ప్రకటించారు.

ఈ చిత్రంలో సూర్య.. ‘సంజయ్ విశ్వనాథ్’ అనే టైటిల్ పాత్రలో నటిస్తుండగా, ‘ప్రేమలు’ బ్యూటీ మమితా బైజు కథానాయికగా నటిస్తోంది. అలాగే సీనియర్ నటీమణులు రాధికా శరత్‌కుమార్, రవీనా టాండన్ కీలక పాత్రలు పోషిస్తున్నారు. తనకంటే దాదాపు ఇరవై ఏళ్లు చిన్నదైన ఒక యువతి.. సంజయ్ విశ్వనాథ్ వెంటపడుతూ ప్రేమ కోసం ప్రయత్నించే క్రమంలో అతని జీవితం ఎలాంటి మలుపులు తిరిగిందనే ఆసక్తికరమైన కథాంశంతో ఈ సినిమా రూపొందుతోంది.

తాజాగా విడుదలైన ఈ సినిమా పోస్టర్‌లో సూర్య అదిరిపోయే వింటేజ్ లుక్‌లో స్టైలిష్‌గా కనిపిస్తున్నారు. పాత రోజుల్లో సూర్యను స్టార్‌ను చేసిన ఆనాటి చార్మింగ్ స్క్రీన్ ప్రెజెన్స్‌ను ఈ లుక్ గుర్తుచేస్తోంది. ఎంతో హుందాగా, కాన్ఫిడెంట్‌గా ఉన్న సూర్య సరికొత్త లుక్.. సినిమాపై అంచనాలను ఒక్కసారిగా పెంచేసింది.