Swayambhu: స్వయంభు నుంచి ఫస్ట్ సాంగ్ ‘ఆజా ధీరరా’ ఏప్రిల్ 16న రిలీజ్
నిఖిల్ సిద్ధార్థ్ యోధుడిగా ఆకట్టుకున్న పోస్టర్… సమ్మర్ 2026లో గ్రాండ్గా రాబోతున్న చారిత్రక చిత్రం ‘స్వయంభు’
నిఖిల్ సిద్ధార్థ్ హీరోగా నటిస్తున్న భారీ చారిత్రక చిత్రం ‘స్వయంభు’ గురించి ఒక అదిరిపోయే అప్డేట్ వచ్చేసింది. 2026లో ప్రేక్షకులు ఎంతో ఆసక్తిగా ఎదురుచూస్తున్న సినిమాల్లో ఇది ఒకటి. ఇప్పటికే విడుదలైన టీజర్ సోషల్ మీడియాలో సెన్సేషన్ క్రియేట్ చేయగా, తాజాగా ఈ సినిమా నుంచి మొదటి సాంగ్కు సంబంధించిన అనౌన్స్మెంట్ వచ్చింది. ఈ చిత్రంలోని ‘ఆజా ధీరరా’ అనే పవర్ఫుల్ ఆంథమ్ను ఏప్రిల్ 16న విడుదల చేయబోతున్నట్లు చిత్రబృందం ప్రకటించింది.
నిఖిల్ ‘కార్తికేయ 2’ సినిమాతో పాన్ ఇండియా స్థాయిలో గుర్తింపు తెచ్చుకున్న సంగతి తెలిసిందే. ఇప్పుడు ‘స్వయంభు’ చిత్రంతో మరోసారి దేశవ్యాప్తంగా తన ముద్ర వేయడానికి సిద్ధమవుతున్నారు. ఈ సినిమాలో ఆయన ‘కృష్ణన్ రామన్’ అనే అత్యంత శక్తివంతమైన యోధుడి పాత్రలో కనిపిస్తున్నారు. ఇటీవల విడుదలైన టీజర్ చూస్తే, నిఖిల్ మేకోవర్, యాక్షన్ సన్నివేశాలు సినిమా ఏ రేంజ్లో ఉండబోతోందో చెప్పకనే చెబుతున్నాయి. ఈ టీజర్కు ఇప్పటికే 18 మిలియన్లకు పైగా వ్యూస్ రావడం విశేషం.
సినిమా ప్రమోషన్స్లో భాగంగా మేకర్స్ విడుదల చేసిన కొత్త పోస్టర్ ఇప్పుడు నెట్టింట వైరల్ అవుతోంది. అడవి నేపథ్యంలో భుజంపై ఈటె పట్టుకుని, కరుడుగట్టిన యోధుడిలా నిఖిల్ కనిపిస్తున్న తీరు అభిమానులను ఆకట్టుకుంటోంది. ఏప్రిల్ 16న రాబోతున్న ‘ఆజా ధీరరా’ పాట ఒక యోధస్ఫూర్తిని (Warrior Spirit) ప్రతిబింబించేలా ఉంటుందని మేకర్స్ చెబుతున్నారు. యుద్ధ క్షేత్రంలో సైనికులను ఉత్తేజపరిచే ఒక గొప్ప ఆంథమ్లా ఈ పాట ఉండబోతోంది.
దర్శకుడు భారత్ కృష్ణమాచారి ఈ చిత్రాన్ని చాలా ప్రతిష్టాత్మకంగా రూపొందిస్తున్నారు. భారతదేశం ప్రపంచానికే మార్గదర్శిగా నిలిచిన ‘స్వర్ణయుగం’ నాటి కథను ఆయన ఎంచుకున్నారు. ఆ కాలంలో చైనా, రోమ్, గ్రీక్, ఆగ్నేయ ఆసియా దేశాలతో మన దేశానికి ఉన్న వాణిజ్య సంబంధాలను, మన నౌకాబల వైభవాన్ని ఈ సినిమాలో చూడవచ్చు. ముఖ్యంగా రాజరాజ చోళుడి కాలంలో భారతదేశపు తొలి నౌకాదళాధిపతిగా పనిచేసిన కృష్ణన్ రామన్ జీవితంలోని కీలక ఘట్టాల ఆధారంగా ఈ కథ సాగుతుంది. ఆయన యుద్ధ తంత్రాలు, సముద్రాధిపత్యం కోసం చేసిన పోరాటాలు ప్రేక్షకులను మంత్రముగ్ధులను చేస్తాయి.
ఈ సినిమాలో కేవలం యుద్ధాలే కాకుండా భారతీయ సంస్కృతి, సంప్రదాయాలకు పెద్దపీట వేశారు. న్యాయం, ధర్మానికి ప్రతీకగా నిలిచే ‘సెంగోల్’ (రాజదండం) ఈ కథలో చాలా కీలక పాత్ర పోషిస్తుంది. చరిత్రలోని వాస్తవాలను, సుదీర్ఘ పరిశోధనను జోడించి ఈ సినిమాను విజువల్ వండర్గా తీర్చిదిద్దుతున్నారు. సాంకేతికంగా కూడా ‘స్వయంభు’ సినిమా సరికొత్త రికార్డులను సృష్టించేలా కనిపిస్తోంది. ‘కేజీఎఫ్’, ‘సలార్’ వంటి చిత్రాలకు సంచలన సంగీతాన్ని అందించిన రవి బస్రూర్ ఈ సినిమాకు మ్యూజిక్ అందిస్తున్నారు. ‘బాహుబలి’, ‘ఆర్ఆర్ఆర్’ వంటి విజువల్ ఎపిక్స్కు పనిచేసిన స్టార్ సినిమాటోగ్రాఫర్ కె.కె. సెంథిల్ కుమార్ ఈ చిత్రానికి కెమెరా బాధ్యతలు చేపట్టారు. అలాగే, ‘బాహుబలి’ ఎడిటర్ తమ్మిరాజు ఈ సినిమా ఎడిటింగ్ వర్క్ చూస్తున్నారు. ఇంత పెద్ద టెక్నికల్ టీమ్ తోడవ్వడంతో సినిమాపై అంచనాలు ఆకాశాన్ని తాకుతున్నాయి.
పిక్సెల్ స్టూడియోస్ బ్యానర్పై భువన్, శ్రీకర్ సుమారు 170 రోజుల పాటు భారీ బడ్జెట్తో ఈ చిత్రాన్ని నిర్మించారు. భారతదేశపు గౌరవనీయమైన చరిత్రను ప్రపంచానికి చాటిచెప్పేలా రూపొందుతున్న ఈ ఎపిక్ డ్రామా 2026 వేసవిలో ప్రపంచవ్యాప్తంగా థియేటర్లలో గ్రాండ్గా విడుదల కానుంది. నిఖిల్ కెరీర్లోనే ఇది బిగ్గెస్ట్ మూవీగా నిలవబోతోంది అనడంలో సందేహం లేదు. ఏప్రిల్ 16న రాబోతున్న ‘ఆజా ధీరరా’ సాంగ్ కోసం ఇప్పుడు అందరూ వెయ్యి కళ్లతో ఎదురుచూస్తున్నారు.
