Vijay Deverakonda–Rashmika Mandanna: హైదరాబాద్‌కు తిరిగొచ్చిన కొత్త జంట విజయ్ - రష్మిక.. కోడగులో ఘనంగా రిసెప్షన్!

Vijay Deverakonda–Rashmika Mandanna: టాలీవుడ్ క్యూట్ కపుల్ విజయ్ దేవరకొండ మరియు రష్మిక మందన్న పెళ్లి తర్వాత తమ పనుల్లో బిజీ అయిపోయారు. ఇటీవల ఉదయ్‌పూర్‌లో అత్యంత వైభవంగా వివాహం చేసుకున్న ఈ జంట, ఆ తర్వాత మార్చి 4న హైదరాబాద్‌లో సినీ, రాజకీయ ప్రముఖుల కోసం గ్రాండ్ రిసెప్షన్ నిర్వహించిన సంగతి తెలిసిందే. తాజాగా రష్మిక సొంత ఊరైన కర్ణాటకలోని కోడగు (కూర్గ్)లో మరోసారి రిసెప్షన్ వేడుకను జరుపుకుని, ఈరోజు తిరిగి హైదరాబాద్ చేరుకున్నారు.

కోడగులో జరిగిన ఈ వేడుకలో రష్మిక మందన్న తన సంప్రదాయాన్ని గౌరవిస్తూ 'కొడవ' శైలిలో పట్టుచీర కట్టుకుని మెరిసిపోగా, విజయ్ కూడా స్థానిక ఆచారాల ప్రకారం సాంప్రదాయ దుస్తుల్లో కనిపించి అందరినీ ఆకట్టుకున్నారు. కేవలం కుటుంబ సభ్యులు, అత్యంత సన్నిహితుల మధ్య జరిగిన ఈ వేడుక అనంతరం ఈ జంట రాజీవ్ గాంధీ అంతర్జాతీయ విమానాశ్రయంలో కెమెరాలకు చిక్కారు. ఈ ఫోటోలు ఇప్పుడు సోషల్ మీడియాలో వైరల్ అవుతున్నాయి.

ఇక వృత్తిపరమైన విషయానికి వస్తే, పెళ్లి తర్వాత ఈ ఇద్దరూ కలిసి "రణబాలి" అనే చిత్రంలో నటిస్తున్నారు. రాహుల్ సాంకృత్యన్ దర్శకత్వంలో మైత్రీ మూవీ మేకర్స్ నిర్మిస్తున్న ఈ పీరియడ్ యాక్షన్ డ్రామాపై భారీ అంచనాలు ఉన్నాయి. రాయలసీమ నేపథ్యంలో సాగే ఈ సినిమాలో విజయ్ 'రణబాలి'గా, రష్మిక 'జయమ్మ'గా అలరించనున్నారు. ఈ ప్రతిష్టాత్మక చిత్రం సెప్టెంబర్ 11, 2026న ప్రపంచవ్యాప్తంగా విడుదల కానుంది. ప్రస్తుతం ఈ సినిమా షూటింగ్ పనుల్లో ఈ జంట బిజీగా ఉండనుంది.