Vishnu Priya Rakes in Huge Earnings: ఇన్‌స్టాగ్రామ్ సబ్‌స్క్రిప్షన్లతో విష్ణుప్రియ కాసుల వర్షం.. నెలకు రూ. 40 లక్షల వరకు సంపాదన!

Vishnu Priya Rakes in Huge Earnings: టెలివిజన్ యాంకర్, నటి విష్ణుప్రియ భీమనేని ప్రస్తుతం సోషల్ మీడియాలో హాట్ టాపిక్ గా మారారు. ఇన్‌స్టాగ్రామ్ సబ్‌స్క్రిప్షన్ ఫీచర్ ద్వారా ఆమె భారీగా ఆర్జిస్తున్నట్లు వార్తలు వస్తున్నాయి. సినిమాల్లో పెద్దగా కనిపించకపోయినప్పటికీ, తన గ్లామరస్ ఫోటోషూట్‌లతో ఇన్‌స్టాగ్రామ్‌లో దాదాపు 1.4 మిలియన్ల మంది ఫాలోవర్లను సంపాదించుకున్న విష్ణుప్రియ, తన ఫాలోయింగ్‌ను ఆదాయ మార్గంగా మార్చుకున్నారు. ఇన్‌స్టాగ్రామ్‌లో 'సబ్‌స్క్రిప్షన్' ఫీచర్‌ను ప్రవేశపెట్టి, డబ్బులు చెల్లించే వారికి మాత్రమే ప్రత్యేకమైన ఫోటోలు మరియు వీడియోలు అందుబాటులో ఉంచుతున్నారు. సాధారణ ఫాలోవర్లకు మాత్రం ఎప్పటిలాగే కొన్ని పోస్ట్‌లు ఉచితంగా కనిపిస్తాయి.

అయితే ఈ పెయిడ్ కంటెంట్ ఇప్పుడు పెద్ద వివాదానికి దారితీసింది. విష్ణుప్రియ తన సబ్‌స్క్రైబర్ల కోసం అడల్ట్ మరియు అభ్యంతరకరమైన ఫోటోలను షేర్ చేస్తున్నారని కొందరు ఆరోపిస్తున్నారు. ఈ విషయంపై ఆంధ్రప్రదేశ్‌లోని పలు ప్రాంతాల్లో ఆమెపై పోలీసులకు ఫిర్యాదులు కూడా అందాయి. ఆన్‌లైన్‌లో అశ్లీలతను ప్రోత్సహిస్తున్నారంటూ కొంతమంది వ్యక్తులు ఫిర్యాదు చేయడంతో ఈ అంశం నెట్టింట సంచలనంగా మారింది.

విచిత్రం ఏమిటంటే, ఈ వివాదం ఆమెకు మరింత కలిసి వచ్చినట్లు కనిపిస్తోంది. గొడవలు మొదలయ్యాక ఆమె సబ్‌స్క్రైబర్ల సంఖ్య అమాంతం పెరిగినట్లు సమాచారం. ప్రస్తుతం విష్ణుప్రియకు సుమారు 9,500 మంది పెయిడ్ సబ్‌స్క్రైబర్లు ఉన్నారని తెలుస్తోంది. నెలకు రూ. 399 చొప్పున సబ్‌స్క్రిప్షన్ ఛార్జీ వసూలు చేస్తుండటంతో, ఆమె నెలవారీ ఆదాయం సుమారు రూ. 40 లక్షల వరకు చేరుకుందని రిపోర్టులు చెబుతున్నాయి. అనన్య నాగళ్ల వంటి ఇతర నటీమణులు కూడా ఈ ఫీచర్‌ను ఉపయోగిస్తున్నప్పటికీ, విష్ణుప్రియ మాత్రం తన సమకాలీనుల కంటే చాలా ఎక్కువ మొత్తంలో సంపాదిస్తూ అందరినీ ఆశ్చర్యపరుస్తున్నారు.