Bollywood senior actress Malaika Arora : నేనెందుకు క్షమాపణలు చెప్పాలి : మలైకా అరోరా

Bollywood senior actress Malaika Arora : బీటౌన్ సీనియర్ నటి, డ్యాన్సర్ మలైకా అరోరా తన ఇమేజ్, ఐటమ్ సాంగ్స్ గురించి ఆసక్తికర వ్యాఖ్యలు చేశారు. 52 ఏళ్ల వయసులోనూ తనదైన గ్రేస్, ఎనర్జీతో అలరిస్తున్న ఆమె, ఐటమ్ సాంగ్స్ చేయడం వల్ల తాను ఎంతో సాధికారతతో ఉన్నట్లు భావిస్తున్నానని, ఆ ఇమేజ్‌ను సొంతం చేసుకోవడంలో తనకు ఎలాంటి పశ్చాత్తాపం లేదని స్పష్టం చేశారు. ఇటీవల ఒక యూట్యూబ్ ఇంటర్వ్యూలో మాట్లాడిన ఆమె, తనపై వచ్చే ట్రోలింగ్‌ను ఏమాత్రం పట్టించుకోనని తేల్చి చెప్పారు.

ట్రోలింగ్‌పై ధీటైన సమాధానం గత ఏడాది యో యో హనీ సింగ్ పాట 'చిల్గమ్', 'థామ్మా' చిత్రంలోని 'పాయిజన్ బేబీ' వంటి స్పెషల్ సాంగ్స్‌లో మలైకా మెరిశారు. అయితే, ఈ వయసులో ఇలాంటి పాటలు అవసరమా అంటూ సోషల్ మీడియాలో ఆమెపై విమర్శలు వచ్చాయి. దీనిపై మలైకా స్పందిస్తూ.. "నేను ఎందుకు తగ్గాలి? నేను చేస్తున్న పనికి ఎందుకు క్షమాపణలు చెప్పాలి? చాలా మంది చాలా రకాలుగా మాట్లాడుతుంటారు, కానీ డ్యాన్స్ అనేది ఒక భావ వ్యక్తీకరణ. 52 ఏళ్ల వయసులో కూడా నేను ఇవన్నీ చేయగలుగుతున్నానంటే, అది దేవుడు ఇచ్చిన వరంగా భావిస్తున్నాను. నేను ఏదో సరిగ్గానే చేస్తున్నాను కాబట్టే ఇది సాధ్యమవుతోంది" అని ఆమె చెప్పుకొచ్చారు.

ఐటమ్ సాంగ్స్ అంటే సాధికారత ఐటమ్ సాంగ్స్ తనకు ఎంతో ఆత్మవిశ్వాసాన్ని, బలాన్ని ఇస్తాయని మలైకా వెల్లడించారు. "స్పెషల్ సాంగ్స్ చేయడం వల్ల నేను చాలా అద్భుతంగా ఫీల్ అవుతాను. బయట ఉన్న మహిళలు నన్ను ఒక ఉదాహరణగా తీసుకుని, తమకు నచ్చిన పని చేస్తూ ఆనందంగా ఉండాలని కోరుకుంటున్నాను. నా పని ద్వారా ఇతరులు స్ఫూర్తి పొందితే, నేను నా పనిని విజయవంతంగా పూర్తి చేసినట్లే" అని ఆమె పేర్కొన్నారు. ఆత్మవిశ్వాసం, స్వీయ విశ్వాసం ఉంటే వయసుతో సంబంధం లేదని ఆమె మరోసారి నిరూపించారు.

ఐకానిక్ సాంగ్స్‌కు కేరాఫ్ అడ్రస్ బాలీవుడ్‌లో 'ఛయ్య ఛయ్య', 'మాహి వే', 'మున్ని బద్నామ్ హుయ్', 'అనార్కలి డిస్కో చలి' వంటి ఎన్నో ఐకానిక్ సాంగ్స్‌తో మలైకా తనకంటూ ఒక ప్రత్యేక ముద్ర వేసుకున్నారు. వయసు పెరుగుతున్నా తన ఫిట్‌నెస్‌తో, డ్యాన్స్ మూమెంట్స్‌తో నేటి తరం నటీమణులకు గట్టి పోటీ ఇస్తున్నారు. ప్రజల అభిప్రాయాల కంటే తన నమ్మకాలే తనకు ముఖ్యమని, సమాజం విధించే వయసు పరిమితులను తాను లెక్కచేయనని ఆమె ఈ సందర్భంగా స్పష్టం చేశారు.