Director Rahul Sankrityan: రణబాలిగా విజయ్ దేవరకొండ ఎందుకు? అసలు సీక్రెట్ బయటపెట్టిన దర్శకుడు రాహుల్ సాంకృత్యన్..

Director Rahul Sankrityan: రౌడీ స్టార్ విజయ్ దేవరకొండ, దర్శకుడు రాహుల్ సాంకృత్యన్ కాంబినేషన్‌లో తెరకెక్కుతున్న ప్రతిష్టాత్మక పాన్ ఇండియా పీరియాడిక్ డ్రామా రణబాలి. గతంలో వీరిద్దరి కలయికలో వచ్చిన టాక్సీవాలా సూపర్ హిట్‌గా నిలవడంతో, ఈ సరికొత్త ప్రాజెక్ట్‌పై సినీ వర్గాలతో పాటు ప్రేక్షకుల్లోనూ భారీ అంచనాలు నెలకొన్నాయి. ఈ సినిమాలో విజయ్ గతంలో ఎన్నడూ చూడని విధంగా ఓ వీరోచిత యోధుడి పాత్రలో కనిపించనున్నాడు. అయితే ఈ పవర్‌ఫుల్ పాత్రకు విజయ్‌నే ఎందుకు ఎంపిక చేసుకున్నారనే ఆసక్తికర విషయాన్ని దర్శకుడు రాహుల్ సాంకృత్యన్ తాజాగా పంచుకున్నారు.

విజయ్ మాత్రమే ఎందుకు? రాహుల్ సాంకృత్యన్ మాటల్లోనే..

ఈ పాత్ర ఎంపికపై దర్శకుడు రాహుల్ స్పందిస్తూ.. కథ రాసుకున్నప్పుడే ఓ యోధుడికి ఉండాల్సిన సహజమైన గంభీరత, స్థాయి ఉన్న హీరో కావాలని భావించినట్లు తెలిపారు. "ఓ పరాక్రమవంతుడైన యోధుడి పాత్రకు ఎవరు న్యాయం చేయగలరని ఆలోచించిన వెంటనే నా మదిలో మెదిలిన ఒకే ఒక్క పేరు విజయ్ దేవరకొండ. శారీరక భాష, ఆహార్యం, గంభీరమైన వ్యక్తిత్వం ఈ పాత్రకు ప్రాణం పోస్తాయి" అని రాహుల్ పేర్కొన్నారు.

నటనలో సరికొత్త లోతు

కేవలం కత్తి పట్టి పోరాడటమే కాకుండా భావోద్వేగాలను పండించడంలోనూ విజయ్ నటనలోని సరికొత్త కోణాన్ని ఈ చిత్రం ఆవిష్కరిస్తుందని, ఆయనలోని పూర్తిస్థాయి నటనా సామర్థ్యాన్ని 'రణబాలి'లో చూస్తారని దర్శకుడు ధీమా వ్యక్తం చేశారు.

ప్రత్యేక ఆకర్షణగా రాయలసీమ యాస..

ఈ సినిమాలో విజయ్ దేవరకొండ పలకబోయే సంభాషణలు ప్రధాన హైలైట్‌గా నిలవనున్నాయి. ఈ యోధుడు చెప్పే సంభాషణలు అచ్చమైన రాయలసీమ యాసలో సాగనున్నాయి. సాధారణంగా సీమ యాసలో లోతైన భావాలు, పదునైన డైలాగులను స్పష్టంగా పలకడం సవాలుతో కూడుకున్న పని. అయితే విజయ్ దేవరకొండ ఆ యాసను ఒడిసిపట్టి సంభాషణలు పలికిన తీరు థియేటర్లలో ప్రేక్షకులకు గూస్‌బంప్స్ తెప్పిస్తుందని చిత్ర యూనిట్ విశ్వాసం వ్యక్తం చేస్తోంది.

విభిన్నమైన కథలతో ఎప్పటికప్పుడు ప్రయోగాలు చేసే విజయ్ దేవరకొండ, ఈసారి చారిత్రక నేపథ్యమున్న యోధుడి పాత్రలో ఎలా మెప్పిస్తాడో చూడాలని అభిమానులు ఎంతగానో ఎదురుచూస్తున్నారు.