Lord Venkateswara: శ్రీవారికి నిత్యం 45 రకాల ప్రసాదాల నివేదన.. వైఖానస ఆగమ సంప్రదాయాలకు అనుగుణంగా ప్రత్యేక నైవేద్యాలు

Lord Venkateswara: తిరుమల శ్రీవేంకటేశ్వరస్వామివారికి ప్రతిరోజూ వివిధ రకాల అన్నప్రసాదాలు, పిండి వంటలు, ఇతర రుచికరమైన పదార్థాలను శాస్త్రోక్తంగా నైవేద్యంగా సమర్పించడం ఆనవాయితీగా వస్తోంది. ఉదయం, మధ్యాహ్నం, రాత్రి వేళల్లో నిర్వహించే నైవేద్య కైంకర్యాల్లో ఆయా సమయాలకు అనుగుణంగా ప్రత్యేకమైన ప్రసాదాలను స్వామివారికి సమర్పిస్తారు. నైవేద్యం, రాజభోగం, శయనభోగం వంటి కైంకర్యాల ద్వారా శ్రీవారి ఆలయంలో ప్రాచీన ఆగమ సంప్రదాయాలు నేటికీ కొనసాగుతున్నాయి.

తిరుమల శ్రీవారి ఆలయంలో నైవేద్యాలకు ప్రత్యేకమైన వైఖానస ఆగమ సంప్రదాయాలు ఉన్నాయి. ఆలయంలోని పోటులో నైవేద్య పదార్థాలను అత్యంత పవిత్రతతో, సాంప్రదాయ పద్ధతులకు అనుగుణంగా సిద్ధం చేస్తారు. నైవేద్యాల తయారీలో ఉపయోగించే పదార్థాలు, పాత్రలు, వంట విధానాలకు కూడా ప్రత్యేక ప్రాధాన్యత ఉంటుంది. శ్రీవారి నైవేద్యంలో ఎండుమిర్చి, పచ్చిమిర్చిని ఉపయోగించకుండా నల్లమిరియాలను వినియోగించడం ప్రాచీన సంప్రదాయంగా కొనసాగుతోంది. వైఖానస పరిభాషలో భక్తులు పులిహోరగా పిలుచుకునే ప్రసాదాన్ని ‘తింత్రిణీరసాన్నం’, నెయ్యి పొంగలిని ‘ముద్గాన్నం’, బెల్లం అన్నాన్ని ‘గుడాన్నం’, మిరియాల అన్నాన్ని ‘మరీచ్యాన్నం’, వడను ‘మాషాపూపం’, దోశను ‘చక్రప్పం’ అని పిలుస్తారు. ఈ సాంప్రదాయ పేర్లు, వాటి తయారీ విధానాలు శ్రీవారి నైవేద్యాల వెనుక ఉన్న ప్రాచీన ఆగమ సంప్రదాయాల ప్రత్యేకతను తెలియజేస్తున్నాయి.

నైవేద్య ప్రియుడైన శ్రీవారికి అనునిత్యం మొత్తం 45 రకాల ప్రసాదాలను నివేదించడం విశేషం. వీటిలో 20 రకాల అన్న ప్రసాద నైవేద్యాలు కాగా, మరో 25 రకాల పణ్యారములు లేదా పిండి వంటలు ఉంటాయి. ఆలయంలో మొదటి గంట అనంతరం ఉదయం నైవేద్యాన్ని సమర్పిస్తారు. ఈ సమయంలో మాత్రాన్నం, ముద్గాన్నం అంటే నెయ్యి పొంగలి, తింత్రిణీరసాన్నం అంటే పులిహోర, దధ్యోదనం అంటే పెరుగన్నం, గుడాన్నం అంటే బెల్లం అన్నం లేదా చక్ర పొంగలి, శాకాన్నం అంటే కదంబం అన్నం, శర్కరాన్నం అంటే రవ్వకేసరి వంటి ప్రసాదాలను స్వామివారికి నివేదిస్తారు. వీటితో పాటు లడుకం అంటే లడ్డు, మాషాప్పం అంటే వడ, గుడప్పం అంటే అప్పం, చక్రప్పం అంటే దోశ వంటి నాలుగు రకాల పణ్యారములను కూడా నైవేద్యంగా సమర్పిస్తారు.

రెండో గంట అనంతరం స్వామివారికి మధ్యాహ్న నైవేద్యం లేదా రాజభోగాన్ని నిర్వహిస్తారు. ఈ సమయంలో శుద్ధాన్నం అంటే తెల్ల అన్నం, పులిహోర, గుడాన్నం, దధ్యోదనం, శీరా లేదా శక్కరభాత్ వంటి ప్రసాదాలను సమర్పిస్తారు. మూడో గంట అనంతరం రాత్రి నైవేద్యంగా శయనభోగాన్ని నిర్వహిస్తారు. ఇందులో మరీచ్యాన్నం అంటే మిరియాల అన్నం, చక్రప్పం అంటే దోశ, లడుకం అంటే లడ్డు, మాషాప్పం అంటే వడ, శర్కరాన్నం తదితర ప్రసాదాలను స్వామివారికి సమర్పిస్తారు. సాయంకాల ఆరాధన సమయంలో గర్భాలయాన్ని మరోసారి శుభ్రపరిచి, శ్రీవారిని తాజా పుష్పాలతో అలంకరిస్తారు. సాయంకాల కైంకర్యాల అనంతరం నిర్వహించే శయనభోగంలో భాగంగా అర్ధరాత్రి సమయంలో ‘తిరువీసం’ అనే ప్రత్యేక నైవేద్యాన్ని సమర్పిస్తారు. ఇందులో తెల్ల అన్నంతో పాటు బెల్లంతో తయారు చేసిన తీపి రుచిగల గుడాన్నం ఉంటుంది. రోజులో చివరిగా నిర్వహించే ఏకాంత సేవలో స్వామివారికి వెచ్చని పాలు, కాలానుగుణంగా లభించే ముక్కలుగా కోసిన పండ్లు, నెయ్యిలో వేయించిన ఎండు పండ్లను సమర్పిస్తారు.

శ్రీవారికి సమర్పించే ప్రతి నైవేద్యమూ ఆలయ సంప్రదాయాలు, ఆగమ విధానాలకు అనుగుణంగా ప్రత్యేక పద్ధతిలో సిద్ధం చేసి సమర్పిస్తారు. ప్రతి నైవేద్యానికి ప్రత్యేకమైన పేరు, తయారీ విధానం, సమర్పించే సమయం ఉండటం తిరుమల ఆలయ వైభవాన్ని ప్రతిబింబిస్తోంది. భక్తులు ప్రసాదంగా స్వీకరించే పులిహోర, పొంగలి, వడ, అప్పం తదితర పదార్థాల వెనుక ఇమిడి ఉన్న ప్రాచీన వైఖానస ఆగమ సంప్రదాయాలు శ్రీవారి నైవేద్యాల ప్రత్యేకతను మరింతగా తెలియజేస్తున్నాయి. ప్రతిరోజూ వివిధ సమయాల్లో నిర్వహించే ఈ నైవేద్య కైంకర్యాలు తిరుమల శ్రీవారి ఆలయ ప్రాచీన వైదిక, ఆగమ సంప్రదాయాలకు ప్రతీకగా నిలుస్తున్నాయి.