Adhika Jyeshtha Masam 2026: అధిక జ్యేష్ఠ మాసం 2026: ప్రతి 3 ఏళ్లకొచ్చే ఈ మాసం ప్రత్యేకత ఏంటి? ఈ రోజుల్లో ఏ పనులు చేయాలో, ఏవి చేయకూడదో తెలుసుకోండి..

Adhika Jyeshtha Masam 2026: హిందూ క్యాలెండర్‌లో అధిక మాసం లేదా పురుషోత్తమ మాసంకు అత్యంత పవిత్రమైన ప్రాముఖ్యత ఉంది. ప్రతి మూడు సంవత్సరాలకు ఒకసారి వచ్చే ఈ అరుదైన మాసం.. ఈ ఏడాది జ్యేష్ఠ మాసంలో వచ్చింది. అందుకే దీనిని అధిక జ్యేష్ఠ మాసం అని పిలుస్తారు. శ్రీమహావిష్ణువు అనుగ్రహాన్ని పొందేందుకు, చేసిన పాపాలను పరిహరించుకోవడానికి ప్రకృతి మనకు ప్రసాదించిన అద్భుతమైన సమయం ఇది. ఇంతకీ అసలు అధిక మాసం ఎందుకు వస్తుంది? ఈ నెల రోజులు ఎలాంటి నియమాలు పాటించాలో ఇప్పుడు వివరంగా తెలుసుకుందాం.

అధిక మాసం వెనుక ఉన్న ఖగోళ రహస్యం ఏమిటి?

భారతీయ కాలగణన ప్రకారం.. సౌర మానం (సూర్యుని కదలిక), చంద్ర మానం (చంద్రుని కదలిక) అనే రెండు క్యాలెండర్లు ఉంటాయి.

చంద్ర సంవత్సరంలో 354 రోజులు ఉండగా.. సౌర సంవత్సరంలో 365 రోజులు ఉంటాయి. అంటే ప్రతి సంవత్సరం ఈ రెండింటి మధ్య సుమారు 11 రోజుల వ్యత్యాసం వస్తుంది.

ఈ తేడా మూడు సంవత్సరాలు గడిచేసరికి సుమారుగా ఒక నెల అవుతుంది. ఈ సమయాన్ని సర్దుబాటు చేసి, రుతువుల క్రమం తప్పకుండా చూడటం కోసం ప్రతి 32 నెలలకు ఒకసారి క్యాలెండర్‌కు ఒక అదనపు నెలను కలుపుతారు. దీనినే అధిక మాసం అంటారు.

పురుషోత్తమ మాసం అనే పేరు ఎలా వచ్చింది?

పురాణాల ప్రకారం.. ప్రతి నెలకు ఒక అధిదేవత ఉంటారు. కానీ అధిక మాసానికి ఏ దేవతా అధిపతిగా ఉండటానికి అంగీకరించలేదు. దీనితో అందరూ తనను మల మాసం అని పిలుస్తున్నారని బాధపడుతూ ఆ మాసం విష్ణుమూర్తికి మొరపెట్టుకుంది. అప్పుడు దయామయుడైన శ్రీహరి అనుగ్రహించి, ఆ మాసానికి తానే అధిదేవతగా ఉంటానని ఆశీర్వదించి.. తన శ్రేష్ఠమైన నామమైన పురుషోత్తమ అనే పేరును ప్రసాదించారు. అందుకే దీనిని పురుషోత్తమ మాసం అని పిలుస్తారు.

2026 అధిక జ్యేష్ఠ మాసం ముఖ్య తేదీలు..

ఈ ఏడాది జ్యేష్ఠ మాసం రెండు సార్లు వస్తుంది. అంటే మొత్తం 60 రోజుల పాటు ఈ జ్యేష్ఠ ప్రభావం ఉంటుంది.

అధిక జ్యేష్ఠ మాసం: 2026, మే 17 (ఆదివారం) నుండి జూన్ 15 (సోమవారం) వరకు కొనసాగుతుంది.

నిజ జ్యేష్ఠ మాసం (సాధారణ నెల): జూన్ 16 నుంచి జూలై 13, 2026 వరకు ఉంటుంది.

ఈ మాసంలో ఏమి చేయాలి?

అధిక మాసం అనేది కేవలం భగవత్ చింతనకు, ఆధ్యాత్మిక ఎదుగుదలకు కేటాయించిన సమయం. ఈ నెల రోజుల్లో చేసే పుణ్యకార్యాలకు వేల రెట్లు ఫలితం దక్కుతుంది.

మంత్ర జపం: ఈ నెల అంతా ఓం నమో భగవతే వాసుదేవాయ అనే ద్వాదశాక్షరి మంత్రాన్ని జపించడం, విష్ణు సహస్రనామ పఠనం మరియు శ్రీమద్భాగవత పురాణ శ్రవణం విశేష ఫలాన్ని ఇస్తాయి.

దానధర్మాలు:

పేదలకు అన్నదానం చేయడం, ఆలయాలలో దీపారాధన చేయడం మంచిది. సాంప్రదాయం ప్రకారం 33 సంఖ్య గల రసగుల్లాలు లేదా అపూపాలను కాంస్య పాత్రలో ఉంచి దానం చేయడం అత్యంత శుభప్రదం.

జీవనశైలి:

వీలైతే ఈ 30 రోజులు ఉపవాసం ఉండాలి లేదా రోజుకు ఒకసారి మాత్రమే సాత్విక ఆహారం తీసుకుంటూ సంపూర్ణ బ్రహ్మచర్యం పాటించడం ఉత్తమం.

ఈ మాసంలో ఏ పనులు చేయకూడదు?

అధిక మాసంలో ప్రాపంచిక సుఖాలకు, నూతన వ్యాపార ఆరంభాలకు ముహూర్తాలు ఉండవు. ఈ సమయంలో ఎలాంటి శుభకార్యాలు చేయకూడదని శాస్త్రాలు చెబుతున్నాయి:

వివాహాలు చేయడం.

ఉపనయనం చేయడం.

గృహప్రవేశాలు, శంకుస్థాపనలు.

నూతన వ్యాపారాలు, ఉద్యోగాలు లేదా కొత్త సంస్థలను ప్రారంభించడం.

పిల్లల నామకరణ వేడుకలు (బారసాల) వంటి ఎలాంటి నిత్య, కామ్య శుభకార్యాలకైనా ఈ మాసంలో ముహూర్తాలు నిషిద్ధం.